Hmeichhiate thlavâng hauhsak tlat an ni ang - Home Minister

Seling MHIP chuan nimin khan Seling YMA Runah an kum 40-na, ruby jubilee an lawm a, khuallian, minister R Lalzirliana chuan, sorkarin hmeichhiate thlavâng a hauhsak tlat tur thu a sawi.

Home Minister chuan, sorkar hmalakna leh police-te thawh ṭhat avangin tunah chuan Mizo hmeichhiate'n hleilenna an tawhin an zualko ngam tawh tih a sawi a, "Hmeichhiate'n an chunga dik lohna thlengte hi zah vang emaw, hlauh vang emawa zêp chi a ni lo a, hmeichhiate thlavang hi hauhsak tlat a ni zel ang," a ti.

R Lalzirliana sawi danin, India ram pum­ah hmeichhia - naupang an ni emaw, kum upa lam an ni emaw, an chunga hleilenna lantirna a tam a, Mizoramah pawh report a tam. Mizoramah bik chuan ruihhlo tam tak vang a ni tih hai theih ni lo mah se, kawng tam takah chuan sorkar leh tlawmngai pawlte'n awareness campaign an buatsaih ṭhat avangin police leh Social Welfare lama in report ngam leh a nachang hria an tam phah a ni.

Mizo hmeichhiate dinhmun chu hmanlai pipute hunlai nen khaikhinin a ṭha tawh hle tih sawiin R Lalzirliana chuan, "Zirna lamah leh eizawnna kawngah pawh mipa aia ti ṭha leh thawk tha zawk an tam tawh hle a ni," a ti a; inneih leh inṭhen chungchangah pawh hmeichhiate chanvo leh dikna hum turin sorkarin dan felfai tak a siam tawh thu a sawi.

Home Minister chuan, mi hlawhtling chhuanawm tak takte'n an kalna apiangah Mizo hming an tiṭha ṭhin tih sawiin, "Chu­tihrual chuan, mi tlemtê vangin hnam pum, state pum hmingchhiatna a thleng thei bawk tih hriat tel a pawimawh. Hemi kawngah hian MHIP pawhin hma la ve se, hmeichhiate chu khawi hmunah pawh chhungkua, khawtlang leh ramah a ni emaw, inremna siamtu an ni thei a ni," a ti.

Seling MHIP jubilee lawmna-ah hian khawtlang leh pawl tana an thawh ṭhat avangin Lalchhanhima Chhangte, RTC Lalduhawmi leh T Lalramsiami te hnenah chawimawina hlan a ni.