MZI-in an din champha an lawm

Mizo Zaimi Inzawmkhawm (MZI) chuan nimin khan Aizawl Civil Hospital-ah an din champha vawi 37-na pualin blood donation camp an huaihawt a, Health minister Lal Thanzara'n a hmanpui.

Health Minister chuan, thisen thlakna tur mithiamte’n an la hmuh chhuah loh avangin khawvelah kum tin mi maktaduai 112-in thisen an pe ṭhin tih WHO-in a tarlan thu sawiin, "India pawhin kum tin unit maktaduai 12 vel thisen a mamawh a, Mizoramah hian kum tin unit 25,000 vel mamawh ṭhin a ni," a ti.

India rama district eng emaw zat blood bank la awm lohna a awm laiin, Mizorama district zawng zawngah blood bank hawn a ni tawh tih sawiin Lal Thanzara chuan, "Heng bakah hian kohhranin Synod Hospital leh Christian Hospital-ah an nei a. Heng blood bank 10-te hian theihtawpin mipui rawngbawlin, ṭhahnemngai takin hna an thawk ṭhin," a ti a; blood bank-te tihchangtlun nan NHM kaltlangin bungrua eng emaw zat lei a nih tawh thu a sawi.

MZI president Lalrinmawia Ralte chuan, pawl din chhan ber chu mi dangte tana malsawmna nih a nih thu sawiin, "MZI pawhin rising day lawmna chi khat atan thisen pek an thlang ta a ni," a ti.

MZI 37th. Rising Day blood donation camp hawn inkhawmah hian Mizo zinga thisen pe hnem ber Lalremruata (unit 65) leh hmeichhe zinga pe hnem ber Rebecca Saimawii (unit 56)-te hnenah chawimawina hlan a ni.