Hortoki kawngah truck kal phal lo
Hortoki khuaa tlawmngai pawl inzawmkhawm, Joint Action Committee chuan Kawnpui leh Hortoki inkar kawngah September ral hma chuan lirthei lian rit phur kal an phal lo a; Railway tunnel siam zawh hma ngeiin kawng chu blacktop an phût bawk.
Thu dawn danin, Hortoki JAC hruaitute chu August 29, Thawhlehni zan khan an ṭhukhawm a; kawng hi commercial vehicle - maxicab, etc. te harsatna awm loa an kal tlang theih turin September thla chhungin an siam tur a ni, an ti. Rel kawng tur siamtu NEF Railways mamawh - buhfai, gas, diesel leh thil dangte chu 407 truck aia lian/rit lo hmang chauha phurh an phal bakah, kawng siamna atana mamawh phur motor lian tih loh chu motor lian kal an remti lo a ni.
Nimin khan Kawnpui SDO(C) pisaah Kolasib additinal DC Lalṭanpuia kaihhruaiin, Kolasib addl. SP, Kolasib-a PWD EE, Kawnpui SDO(C), NEF Railways hotu te, Hortoki JAC hruaitu te, Kawnpui VC leh Kawnpui Joint YMA hruaitute an ṭhukhawm. Meeting-ah hian rel kawng siamtute chuan, motor lian kal phal loh vangin an hnain a tuar dawn niin an sawi a; Hortoki JAC erawh chuan hna thawh an phalsak reng thu leh 407 truck chin hnuai lam kal an phal reng thu an sawi thung.