KHAWTHLIR

Tlan khap
Champhai DC Vanlalngaihsaka chuan Thawhlehni khan thupek chhuahin, fur ruahtui a tlak tam leh tak atanga Champhai district chhung­a kawngpuite chu hmun tam takah a chhia tih tarlangin, "Lirthei kal velin harsatna an tawh mek avangin thla hnih chhung atan kan district chhungah mipui nitin mamawh phur ni lo lirthei ke ruk aia tam nei chu tlan khap a ni," a ti.

Health camp
Aizawl district-a AH&Vety officer leh Mizoram State Vety Council-te ṭangkawp chuan, Thawhlehni khan Tlungvelah Animal Health Camp an buatsaih a, ran chi hrang hrang 1,786 hriselna dinhmun an endik a, a thlawnin damdawi an pe vek a ni.

Thisen pe
Mizoram Hindi Training College chuan nimin khan blood donation camp an huaihawt a, Synod Hospital tan mipa 14 leh hmeichhia pathumte'n thisen unit 17 an pe. Mizo Zaimi In­zawmkhawm pawhin an din champha law m nan Aizawl Civil Hospital-ah thisen unit 14 an pe a, Serchhipa MZI-te'n JN Hospital-ah unit thum an pe bawk.

NLUP sem
Commerce & Industries department chuan nimin khan Siaha DIC conference hall-ah NLUP an sem. NLUP semna hun hmanpuitu, Assembly speaker Hiphei chuan, miin tumruhna, taimakna leh rinawmna nena an thawh chuan, eng hna pawh thawk se an hlawhtling ṭhin tih a sawi. Ṭanpuina hi a dawngtute hnenah Rs. 46,762 leh thingzai khawl pariat ṭheuh pek a ni.

Damdawi-in tifai
MZP sub-headquarters, Lungsen huaihawtin Lungsena high school leh higher secondary school zirlaite'n Lungsen damdawi-in leh a chheh-vel an tifai. Hnatlangah hian zirlai 100 vel an thawk chhuak a ni.

Tanpuina hlan
June 13, 2017-a Tlawng lui lian avanga Sairang khuaa harsatna tawkte tana Sairang khawtlang hruaitute'n ṭanpuina an dawn tling khawm, Rs. 6,35,667 chu nimin khan he tuilian tuartu chhungkaw hrang hrang hnenah sem a ni.