LMC inthlan atana inbuatsaihna tur Sorkarin SEC hnenah pawisa a pe ; Inthlan buatsaih turin SEC-in hma a la

Mizoram sorkar chuan September 13, 2022 chawhnu khan Mizoram State Election Commission (SEC) hnenah Lunglei Municipal Council (LMC) inthlan atana inbuatsaihna tur pawisa a pe. SEC hian LMC inthlan buatsaih turin hma an la mek a ni.

Vanglaini palai zawhna chhangin state election commissioner (SEC) Laima Chozah chuan, LMC inthlan buatsaihna atan hian Mizoram sorkarah pawisa an dil thu a sawi a, "Inthlan senso atana mamawh zat tur chhût turin Lunglei DC kan ti a, ani hian ruahmanna a rawn siam a ni. A ruahmanna siam hi tam deuha kan hriat avang leh state sorkarin min pek theih loh kan hlauh avangin siam ṭha leh turin kan ti a, a rawn siam ṭhat leh hnuah GAD kaltlangin Finance dept.-ah thehluh a ni," a ti.

Laima Chozah chuan sum mamawh tur nia an hriat an thehluh chu Finance department lamin tam an tih thu sawiin, "Heivang hian thil ṭhenkhat kan paih leh," a ti a, an sum dilte hi September 13, Thawhlehni chawhnu khan pek an nih tâk thu a sawi.

LMC inthlan tur atan a theih ang angin an inbuatsaih thu sawiin Laima Chozah chuan, "LMC inthlan neih tur atan Lunglei DC Kulothungan A chu District Municipal Election Officer & Appellate Authority atan kan ruat tawh. Inthlan atana official mamawh tur dangte pawh SEC hnuaia deputation-a awm turin kan ruat belh zel ang," a ti.

Laima Chozah chuan, LMC inthlan hun tur chu SEC-in sorkar sawipui turin danah ziah a nih thu sawiin, "Pawisate kan dawn hunah inthlang turin kan inbuatsaih ang a, chumi hunah chuan inthlan hun tur chu sorkar kan sawipui ang," a ti a, SEC lam chu thla hnih chhungin inthlan buatsaih tura an inpeihfel theih a beisei thu a sawi.

Pawisa an dawn tak avang hian SEC chuan pawisa an dawn ni September 13 tlaiah notification ti chhuakin LMC inthlan tur atan eletoral roll revision neih a nih dawn thu a tarlang.

Roll revision atan hian September 23, 2022-ah draft roll tlangzarh a ni ang a, sawisel leh siamṭhat duh neite tan September 30 thleng hun hawn niin, hengte hi October 7, 2022 chhunga chinfel a ni ang. Final roll chu October 14, 2022-ah tlangzarh tur a ni.

Sorkar kum kal mek 2022-2023 budget-ah Mizoram sorkar chuan LMC atan hian cheng nuai 80 a dah. LMC chief executive officer atan H Lalhmingthanga, MCS ruat a ni tawh bawk.

Tarlan tawh ṭhin angin, LMC nodal depart­ment UDPA changtu dy. chief minister Tawnluia chuan LMC inthlan hi kumin chhung ngeia buatsaih tum a nih thu a lo sawi tawh a ni.