Union Minister of State-in Larsap leh official-te a kawm

Minister of State for Consumer Affairs, Food & Public Distribution and Rural Development Sadhvi Niranjan Jyoti chuan September 13, Thawhlehni zan khan Raj Bhavan-ah governor Dr Hari Babu Kambhampati a kawm bakah, Hotel Floria, Aizawlah Rural Development, Food, Civil Supplies & Consumer Affairs department leh PWD hotute a kawm a, sorkar laipui scheme leh project hrang hrang thawh mek dinhmun a sawipui.

Governor nen an inkawmnaah Sadhvi Niranjan Jyoti chuan Mizoram chu ram pahnih in an karcheh avangin hmarchhak state bikah chuan a pawimawh hle nia a hriat thu leh Mizoram hmasawnna turin theihtawp chhuah a tum thu a sawi.

Official-te nen an inkawmnaah Union MoS chuan, sorkar laipui chu ruahmanna hrang hrang siamtu nih mah se, a taka hna thawktute chu state sorkar hrang hrangte an nih thu a sawi a, "Sorkar laipui chuan state sorkarte chu ang khatin a en vek ṭhin. Sorkar hi mi tin ta, mi tin tan a ni a, PM chuan ramchhung state zawng zawngte'n rualkhai taka hma an sawn nan theihtawp a chhuah mek," a ti a, hmarchhak state-te leh an hmasawnna chu PM-in a ngaihpawimawh avangin central minister-te chu hmarchhak state-te tlawh reng turin a hrilh ṭhin niin a sawi.

Rural Development minister Lalruatkima chuan sorkar laipuiin hripui lên laia kawng hrang hranga Mizoram sorkar a puihnaah lawm­thu a sawi a, "Thingtlang lamin hma an sawn ve loh chuan khawpui ringawt hmasawnna in rualkhai takin hmasawnna a thlen lo. Mizoram sorkar hian kawng hrang hranga thingtlang hmasawnnate hi a ngaih pawimawh berte zing a mi a ni," a ti.

Union Minister of State hian nimin khan aspirational district - Mamit a tlawh a, Tourist Lodge-ah sorkar hotu te leh khawtlang hruaitute nen an inkawm. Mamit IPR conference hall-a self help groups-te'n exhibition an buatsaih chu a tlawh nghal bawk

Sadhvi Niranjan Jyoti chuan, Prime Minister Narendra Modi kaihhruai sorkar laipui in ram intodelh siam an tum thu te, hmasawnna hna kalpui laiin hniàm châng leh sàn châng a awm ṭhin thu te, tha thlah loa theihtawpchhuah zel tur leh sorkar hna ringawt ni lo, themthiamna hmanga eizawnna tur kawng zawng turin district hotu­te leh khawtlang hruaitute a chah a ni.