Mizoramin agriculture-ah award a dawng

ICAR,Ministry of Agriculture and Farmers Welfare leh Outlook Group chuan Mizoram chu 'Best Performing State in Agri­culture Among the North East States' atan an thlang a, award hi nimin khan Outlook Agri Tech Summit and Swaraj Awards-ah Agriculture minister C Lalrinsanga'n Union Agriculture minister Narendra Singh Tomar hnen aṭangin a dawng.

C Lalrinsanga chuan, Mizoramin lawmman a lak chu agriculture lama thawktu te, a bikin loneitute leh sorkar thawhhona ṭha tak rahchhuah a nih thu a sawi a, "Mizoramin award a dawng hian Mizoram loneitute leh Mizoram sorkarin theihtawp chhuaha tlawm taka hma kan lak ve nate chu India ram hian min hriatpui a ni tih a tichiang a, he lawmman hi Mizoram loneitute tan ka hlan a ni," a ti.

Mizoram chu foreign ram dang pahnih karcheha awm a nih angin India ram tan cultural ambassador hna pawimawh tak a thawk reng tih sawiin C Lalrinsanga chuan,"India ramin Mizo­rama hmasawnna a ngaih pawimawh dan chu khawchhak ram hrang hrangte laka India hmel lanna hlimthla pawimawh tak a ni. Mizoramin agri­culture-ah, a bikin organic leh natural farming-ah theihna tam tak a nei," a ti a, India ram tana thil hlu tak a nih avangin agriculture leh a kaihhnawiha hmarchhak state tan bika scheme siam belh turin sorkar laipui chuan ṭan la se a duh thu a sawi.