Champhaiah SEDP tlangzarh a ni

Minister of state TJ Lalnun-tluanga chuan nimin khan Champhai Kahrawt community hall-ah Mizoram sorkar flagship programme, socio-economic development policy (SEDP) hnuaia Family Oriented SEDP a tlangzarh. Minister chuan, an sorkar tirhah SEDP atan cheng vbc 750 dah a nih thu leh kawng leh infrastructure dang siam nan hman nghal a nih thu a sawi.

TJ Lalnuntluanga chuan, SEDP atan an sorkar tirhah cheng vbc 750 dah a nih thu leh kawng leh infrastructure dang siam nan hman nghal a nih thu sawiin, "Mimal leh chhungkuaa bulṭanna tur atana inpuahchahna kalpui mek laiin hri leng vangin harsatna a awm ta a ni," a ti a, mipuite'n eizawnna ngelnghet an neih theih dan tur sorkarin a ngaih pawimawh thu a sawi.

Sorkar hun tawnin a zir loh avanga tum zat ang chiaha SEDP bulṭan a nih theih loh thu sawiin TJ Lalnuntluanga chuan,"SEDP hi huam zau zawka kalpui zel tum a ni a, a bulṭanna chauh a la ni a, a dang pawh kan la sem chho zel dawn," a ti a, family oriented SEDP dawngtute chu Mizoram leh hnam a intodelh nan theihtawp chhuah tur leh rinawm taka thawk turin a chah.

Minister chuan, tunhnaia siam Land Revenue Amendment Bill 2022 hmangin LSC leh pass pawh awm mumal lohna thingtlangah LSC anga hman theih tur Property Card siam a ni dawn tih a sawi a,"Inhmun lo ram hlutna a tisang ang a, neitu nihna tichiangtu tur bakah, loan lak dahkham atan thlenga hman theih a ni tawh tur hi thingtlanga chengte tan a nghahhlelhawm tak zet," a ti a, sorkar ram hawhtute'n thlai chauh ni lo, leilung hlutna zangnadawmna 85% thlenga an dawng thei tawh tur chu lawmawm a tih thu a sawi bawk.

Family Oriented SEDP hi Champhai district-a MLA bial pathuma chhungkaw 4,500 hnenah sem tur a ni a, SEDP dawng tur te aiawhin line department aiawhte hnenah cheque sem nghal a ni.