Ṭhat loh theih lohna bawm zuartute'n Mipui bumna bawm an hung chhuak - MNF Legislature Party Secretary

MNF Legislature Party (MLP) secretary L Thangmawia, MLA chuan MPCC Media-te chu contractor-te bill pek chhuah danah thup ṭhen neia mipui bum tumah puhin, "Ṭhat loh theih lohna bawm zuar tute hian Mizo mipuite hnenah zep ṭhen tam tak neiin, mipui bumna bawm an rawn hung chhuak a ni," a ti.

L Thangmawia hian nimin khan Aizawl Press Club-ah thuthar theh­darhtute kawmin, MPCC Media-te chuan September 10, 2022-a an press statement siamah ni 1.4.2019 aṭanga ni 14.7.2022 chhungin contractor-te bill cheng nuai 100 chunglam treasury pakuain a pek chhuah dan an tarlan thu a sawi a, "Bill 736 pek chhuah zingah bill 103 chauh thlang chhuakin, sorkar chu contractor duhsak bik nei anga lantir an tum," a ti a, MPCC chuan contractor 100 chuang bill pek chhuah zingah paruk bill pek dan chiah an tarlan thu a sawi.

MPCC-te'n contractor paruk bill thehluh nia pek chhuah an awm thu leh contractor pakhat chu ni thum chhungin bill pahnih release sak a nih thu an ziak tih sawiin MLP Secretary chuan, "MPCC-te'n an tarlan loh bill an thehluh nia pek chhuah bill dang 90 chuang leh, ni thum chhunga bill release bill dang 102 a awm. Heng contractor-te hi duhsak bik an ni ve lo em ni tih hi kan zawhna a ni," a ti.

MLP Secretary chuan contractor pakhat chu chawlhkar khat chhunga a bill cheng vbc. 9.92 release sak vek a nih avangin duhsak bik huangah MPCC-te'n an khunglut tih sawiin, "Chawlhkar khat chhunga tihfel hi a vaiin bill 168 zet a ni. MPCC press statement-a a lan danin chawlhkar khat chhunga bill tihfel sak hi bill 5 an ni a, bill dang 163 chawlhkar khat chhunga fihfel sak ve thote hi duhsak bik an ni ve lo em ni," a ti a, bill pek chhuah zingah hian Bhavan-a nihna neite pawh an awm thu a sawi.

Bill thehluh ni la la-a cheng nuai 100 chuang bill pass nghal belhkhawm chu cheng vbc. 591.19 a nih thu sawiin L Thangmawia chuan, "MPCC-in a bik taka an tarlan bik contractor parukte bill a ni la la-a release belhkhawm chu cheng vbc. 25.85 a ni a, a ni la la-a bill release aṭanga chhutin 4.3% chauh a ni. An sawi tel ve duh tak loh chu cheng vbc. 565.34 (95.7%) a ni," a ti.

MLP Secretary chuan data enin MPCC-te'n contractor duhsak bik riau paruk vel awm anga Zoram mipuite hnena an puangzar chu thudik lo a nihzia a lan chian thu sawiin, "Mizoram sorkar chuan hmasawnna hnathawktute hnenah a remchan dan ang leh sum awm dan ang zelin rualkhai takin bill te a pe chhuak zel ṭhin zawk a ni tih chiang takin a lang," a ti a, MPCC-te thil tihdan chu dik lo taka mipui rilru hruaikawi tumna a nih thu a sawi.