Thluaka sum lut natna hi a hlauhawm - Lalsawta

MPCC president Lalsawta chuan nimin khan an party-in Sakawrdai community hall-a inkhawm an buatsaihah thu sawiin, "Thluaka sum lut natna hi a hlauhawm," a ti.

Lalsawta chuan mihringah lei theih pahnih an awm thu sawiin, "Pakhat chu sal an ni a, sal chuan anmahni leitu tur an thlang thiang lo, a hausa a piangin an duh duh an lei thei. Pakhat leh chu nawhchizuar an ni. Nakkumah tuten emaw lei an rawn tum che u a nih chuan chiang takin lo hrilh rawh u, keini chu lei theih kan ni lo tiin lo chhang rawh u," a ti.

Zahawmna hralhtute'n engmah sawi theih an nei ve tawh lo tih sawiin MPCC President chuan, "Kan tu kan fate tan khawvel thar siam turin i inbuatsaih ang u. Thluaka sum lut hi natna hlauhawm, tihdam theih loh a ni," a ti a, tu leh fate'n an chhuah chhalh lohna turin tun aṭanga ngaihtuahna thar hmang turin mipui a sawm.

Lalsawta chuan Pathianin hnam a dinin ram leh mipui a pe tih sawiin, "Ram kan enkawl dan a zirin ram nuam leh ram hreawmah a chhuak ṭhin. Mihringin he lei kan enkawl danah hian 'I duhzawng vana an tih angin leia mi'n ti rawh se' tia kan dil a hlawhtlin theih nan politics hi kan hmanraw pawimawh ber pakhat a ni. He leia Pathian ram din hi mihringte mawhphurhna a ni," a ti.

MPCC President chuan kuthnathawktute chung­chang sawiin, "Thlai kan thar tlem ṭhin avangin a hralhna chungchangah kan buai ṭhin. A hralh chhuah lama kan buai lohna turin hralh tham thar chhuak thei turin kuthnathawktute kut hi kan ti chak dawn," a ti a, kuthnathawktute hnathawhna atana pawimawh nia hriatte sorkarna an siam chuan an tihsak zel dawn niin a sawi bawk.