ASF vangin 2022-ah vawk 10,680 thi tawh

Vawk pùl hri, African Swine Fever (ASF) vangin kumin 2022 chhungin September 12 thleng khan vawk 10,680 a thi tawh a, khua/veng 149-ah ASF a léng tih finfiah a ni tawh.

AH&Vety department hriatpuinain kuminah nimin thleng khan ASF lênna khua/veng 149 zinga 93-ah vawk 9,187 a thi tawh a, ASF lênna nia rinhlelh khua/veng 70 awm mek zinga 23-ah vawk 368 suat a ni tawh bawk a; ASF vangin Mizorama khua/veng 116-ah vawk 9,555 suat tawh a ni.

Kuminah hian district 11-ah ASF a léng tih finfiah a ni tawh a; ASF lênna khua/veng 149 zinga 39 chu Aizawl district niin a tam ber a; ASF lênna khua/veng 149 zinga vawk suat tamna ber Champhai district-ah khua/veng 28-ah vawk 4,500 suat a ni tawh. Champhai district-ah hian vawk thi 3,764 awm tawhin a tam ber bawk.

Champhai district-a Farkawn khuaah kumin chhungin ASF vanga vawk thi leh suat a tam ber a, vawk 860 thi tawhin, AH&Vety department hriatpuinain vawk 2,011 suat a ni tawh. Nikuma ASF vanga vawk thi tamna ber Lungsen khua (757) aiin Farkawnah hian vawk thi a tam zawk a; nikuma vawk suat tamna ber Lengte khua (2,033) aiin 22-in vawk suat a la tlem zawk thung.

Kumina vawk suat tamna ber Farkawn khua hi Champhai district vêka Dungtlang khuain dawtin, vawk 460 suat a ni tawh bawk.