Minister hoin bank hotute an ṭhukhawm

State cooperative bank hrang hrangte inthlunzawmna pawl National Federation of State Cooperative Banks Ltd (NAFSCOB) chuan nimin khan Aijal Club-ah Annual General Meeting an nei a, minister of state Lalruatkima'n a hmanpui. Minister chuan, Mizoram Cooperative Apex Bank (MCAB) chu ram mipui dinhmun chawikang tura hma an laknate ṭhahnemngaitaka chhunzawm zel turin a chah.

Lalruatkima chuan, MCAB kaltlanga Mizoram mipuiin malsawmna an dawn theihna bul pawimawh tak chu NAFSCOB a nih thu a sawi a, "Cooperative bank sum lakluh aṭanga interest tax lak ṭhin nuai bo turin NAFSCOB hian sorkar laipui hlawhtling takin a dawr a, NAFSCOB vêk hian cooperative credit movement in harsatna a tawhte zirchiang tur leh hmarchhak state-a hmasawnna hna chak zawka thawh a nih theih nan Review and Action Committee on North Eastern Region an din a ni," a ti a, NAFSCOB chu Cooperative Bank-te hmasawn zel nana kawng pawimawh ber a nih thu a sawi.

NAFSCOB Meeting-ah hian India rama State Cooperative Bank hrang hrang aṭangin palai 40 an rawn kal a; NAFSCOB managing director Bhima Subrahmanyam, NAFSCOB chairman Konuduru Ravinder Rao leh MCAB chairman T Lalmuanpuii te'n thu an sawi bawk.