Lunglei district-ah raltlan 2,112 an awm

Lunglei District Level Committee on Myanmar Refugees chu an chairman Kulothungan A, district bawrhsap kaihhruaiin September 13, Thawhlehni khan an ṭhukhawm. September 12, 2022 thleng khan Lunglei district-ah Myanmar raltlan mi 2,112 an awm thu tarlan a ni.

Ṭhutkhawmah hian Hnahthial, Lunglei, Lawngtlai leh Siaha district–a Myanmar raltlan awm mekte mamawh hrang hrang ruahman sak tura hmala mektu NGO- Adventist Development & Relief Agency India (ADRA) leh Mizorama an thawhpui (local implementing partner) Centre for Peace & Development (CPD)-te hmalakna thlirho a ni.

He huna tarlan danin, Myanmar raltlante tana ṭanpuina hi United Nations High Commissioner for Refugees (UNHCR) hnuaia hmalakna a ni a, July 1 - December 31, 2022 thleng kalpui tur a ni. He project hnuaiah hian raltlante mamawh hrang hrang – ei leh bar, mimal mamawh te, blanket, bungbel, bedsheet, naupang tan zirlaibu etc. te pek an nih dawn bakah, ratlante awmna camp-a tui connection leh tui dah khawlna tanky-te ruahman a ni.

ADRA leh CPD-te hian district palia raltlan camp 39-ah raltlante tan - dry food kit 8000, hygiene kit 2500, dignity kit 2500 leh non food item kit 2000 an sem turin an in buatsaih mek a, naupang infiamna hmun (Child Friendly Spaces) 50 siam tawhin naupang 2000 hnenah educational kit an pe dawn.

Lunglei DC pisa chhinchhiah danin, September 12, 2022 thleng khan Lunglei district-ah Myanmar raltlan mi 2,112 an awm tawh a, an zinga mi 1,062 chu camp-ah awmin, mi 1,050 chu camp pawn lamah an awm. Raltlan zing 1,123 chu hmeichhia niin, mipa 989 leh naupang kum 18 hnuai lam 706 an awm bawk.

Raltlante hi an camp leh hmun danga an awmna hmunah kalchilhin Covid-19 vaccine pek ṭhin an ni a; vaccine la thei chin mi 1,429 zingah first dose la tawh mi 721 leh second dose la tawh mi 429 an awm.