Shillong-a zirlai tharte lawmna hmanpui

Shillong Mizo Students’ Union chuan September 13, Thawhlehni khan NEHU convocation hall-ah Shillong-a zirlai lut tharte pualin freshers social an hmang. Minister of state Robert Romawia Royte chuan khuallian niin a hmanpui a, Dr K Pachhunga, MLA chu khualzahawm a ni.

Robert Romawia Royte chuan, Shillong khawpui chu India independent hma daih aṭanga Mizote lehkha zirna hmunpui a nih thu a sawi a,"Vawiin thlengin Mizote tan thiam zirna hmun hlu leh pawimawh a ni a, Mizote tan a pawimawh zual zel a ni. Khawvel history enin nationalism based-in ram a piangin ramrite siam a ni a, Europe ram ropuinachhan pawh hnam hmangaihna leh veina rilru an neih vang a ni," a ti a, Shillong Mizo zirlaite chu Mizo nationalism nunpuia ṭhanlenpui turin a chah.

He hunah hian Dr K Pachhunga bakah, Khasi Students Union general hqrs. general secretary Donald Thaba leh Shillong MSU president John Lalchhanchhuahate pawhin thu an sawi a, zirlai 1,000 chuang an tel.

Robert Romawia Royte hian sawm bikte pualin zanriah a buatsaih nghal a ni.