KHAWTHLIR

Thisen pe
Mizo National Youth Front (MNYF) chuan nimin khan Martarte Ni pualin Hnam Runah thisen pek runpui an buatsaih a, minister, MLA, councillor leh party mi leh sate'n an pe a, mipa 48 leh hmeichhia panga in unit 53 an pe. KṬP, Kolasib Venglai Bial pawhin District Hospital tan thisen unit 35 an pe a, petute mipa 21 leh hmeichhia 14 an ni.

Clinic hawng
Aizawl North-II bialtu MLA Dr Vanlalthlana chuan nimin khan a bial chhung Ramhlun Sports Complex-ah health clinic a hawng. Dr Vanlalthlana chuan health clinic hawn phalna petu sorkar chungah lawmthu sawiin, "Hmun hla zawk pan buai ngai loa mahni veng chhungah ngei khawtlang mipuite'n kan chhawr theih tura health clinic kan nei thei hi a lawmawm hle," a ti. Health clinic atan hian Bialtu MLA hian a fund leh a mimal sum aṭangin hmanraw mamawhte a lei a ni.

Pu Buanga Award
Mizo Academy of Letters (MAL) Jt. Hqrs. Lunglei chuan thu leh hla lama sulhnu nei ṭha leh chawimawi tlak nia an hriatte hnena an hlan ṭhin, Pu Buanga Award, 2022 dawng tur an thlifim mek zel a, top 3 atan J Malsawma, Lalrammawia Ngente leh Prof. RL Thanmawiate an thlang.

Lo thlawh zawh sak
Neihloh Branch YMA-te chuan nimin khan an khuaa khawsak harsa chhungkaw pakhatte lo hnatlangin an zawh sak a, bialtu MLA Lalduhoma pawhin telpuiin, hnatlangte ei leh in tur a tumsak. Lalduhoma chuan Mizo tlawmngaihna pâr chhuahtir a, ṭanpui ngaite an ṭanpui chu ropui a tih thu a sawi.

Raltlan chungchang MEA hotu sawipui
Mizoram State Planning Board vice chairman H Rammawi chuan September 13 tlai khan Ministry of External Affairs jt. secretary Smita Pan chu Delhi-ah kawmin, Myanmar aṭanga Mizorama raltlan awmte Myanmar rama an let leha an security leh an resettlement programme Myanmar sorkarin fel taka a duan loh chuan Mizoram sorkarin Myanmar ramah thawn let a tum lo tih a hrilh. H Rammawi hi Rajya Sahbha MP K Vanlalvena'n a ṭawiawm.