CM-in Prime Minister a kawm ; CS atan Mizo ṭawng thiam ngei pe turin PM a ngen nawn

September 14, Nilaini khan chief minister Zoramthanga chuan New Delhi-ah prime minister Narendra Modi chu a chenna inah a kawm a, Mizoram mamawh hrang hrang a thlen a, a thu thlen zingah chief secretary atan Mizo ṭawng thiam ngei pe tura ngenna a tel.

Zoramthanga hian Narendra Modi hnenah hian Aizawl khawpui laili aṭanga Assam Rifles sawn chhuah vat a ṭul thu te, Chief Secretary atana Mizo ṭawng thiam ngei pek a ngaih thu te, MNF returnee-te tana insakna tur puihna hmachhawp tawhte tihhlawhtlin a nih nana ṭanpuina mamawh a nih thute a thlen a; mipuiin HUDCO aṭanga loan an lo lak tawh cheng vbc 18 vel an la rulh lohte rulh sak turin a ngen nghal.

Chief Minister hian Myanmar ram buaia remna siam turin India sorkarin hma a lak a ngaih thu sawiin, Prime Minister chuan remna siam chu mihringte tih tur pangngai a nih thu leh, theihtawp chhuah a nih tur thuin a chhang a ni.

Zoramthanga hian nimin khan Union Defence minister Rajnath Singh chu a pisaah a kawm. Mizoramin cantonment board area-ah hmun a mamawh ve thu thlenin, Defence Minister chuan a theih anga bawhzuisak a tum tur thu a lo hrilh.

Chief Minister hian Mizoram ramri pahnih - Bangladesh leh Myanmar ramriah Mizo telna paramilitary force dah ṭha a tih thu a sawi a, Rajnath Singh chuan a ṭul angin Home Minister-te nen sawiho ṭha a tih thu a lo hrilh bawk niin sorkar thuchhuahin a tarlang.

Chief Minister hi Delhi Mizoram House resident commissioner Amjad Tak-a'n a ṭawiawm a ni.