Union MoS-in central scheme-ah Mizoramin hma la chak se a duh

Ministry of Consumer Affairs, Food & Public Distribution leh Ministry of Rural Development changtu minister of state Sadhvi Niranjan Jyoti chuan central sponsored scheme (CSS) tih hlawh­tlin kawngah Mizoram sorkar chu a chet muan thu leh hma la chak se a duh thu sawiin, "Central chuan a tih tur a ti a, state-in a tih tur a tih ve a ngai," a ti.

Sadhvi Niranjan Jyoti hian nimin khan Secretariat conference hall-ah thuthar thehdarhtute kawmin, CSS-ah central-in 90% leh state-in 10% an tum ṭhin thu a sawi a, "Central-in pawisa kan released hnua state-in 10% a pek ve phawt loh chuan a dang pek chhuah zel a harsa a ni. Central-in a tih tur a ti a, state-in a tih tur a tih ve a ngai," a ti a, central-in sum released mah se, state-in a tum ve tur a pek chhuah phawt loh chuan hamṭhatna dawng turte'n an dawn theih loh ṭhin thu a sawi.

Pradhan Mantri Awas Yojana (PMAY) hnuaiah miretheite'n in an neih theihna atan Prime Minister-in theihtawp chhuahin hma a la tih sawiin Rural Development Minister chuan, "Mizoram tan hian PMAY hnuaiah mi 15,674 ten in an neih theihna tur sanction a ni a, kum 2023-a zawh vek tur a ni. Hetiang a nih lai hian tunah hian in 5,800 (40% vel) chiah sak zawh a la ni. Minister leh sorkar official-te ka ngen duh chu, a hun taka zo turin hma la se, a dang pawh sanction leh theih a ni dawn," a ti.

Sadhvi Niranjan Jyoti hian Mizorama a kalkualnaah in nei lote'n in an neih loh thu an lo hrilh a, mahse tunah sanction sa hi zawhfel a nih hma chuan a dang sanction theih a nih loh avanga pawi a tih thu a sawi.

Prime Minister-in self help group (SHG) pawh a ngai pawimawh hle tih sawiin Union Minister chuan, "Sorkar laipuia Congress sorkar lai khan Mizoramah SHG 2,600 vel chiah a awm a, BJP sorkar hnuah chuan 7,872 a awm tawh. Congress sorkar khan Mizoram SHG-te tan cheng vbc. 3.80 vel lek a pe a, keini chuan cheng vbc. 41 chuang kan pe chhuak tawh. SHG hnuaiah hian kan Prime Minister hian a bik takin hmeichhiate dinhmun chawikan a ngai pawimawh hle," a ti.

PMGSY hnuaiah Mizoram tan kawng km. 4,442 vela thui laihna atan cheng vbc. 2,840 vel sorkar laipuiin a sanction tawh tih sawiin Sadhvi Niranjan Jyoti chuan, "Mizoram hi international boundary pahnih nei a ni a, chuvangin inkalpawhna chungchangah tih belh theih a awm em tia ngenna Home Minister hnenah ziakin ka thlen dawn.

MNREGA hnuaiah pawh cheng vbc. 258 ruahman a ni a, Mizoram ang state lian lo tan chuan a tam tham a ni," a ti a, sorkar laipui chuan Covid-19 lai pawhin hna a thawh char char thu a sawi.

Union Minister chuan Mizoram loneitute fakin, "Food processing industry din duh an awm chuan hma ka lakpui thei a, duh an awm chuan hma ka lakpui ngei ngei ang," a ti.

Sadhvi Niranjan Jyoti chuan state sorkar ṭhenkhat chuan inthlan dawna an intiamna ang an sorkar hnuah an tih leh loh thu sawiin, "Mizoram sorkar pawhin nuai thum kan sem ang an ti a, an sem lo," a ti a, nuai 5 sem intiam Telegana sorkar pawhin an la sem loh thu a sawi.