Mi taima leh thawkrimte hlawhtlinna ram Ṭang puihnain kan siam dawn - Lalsawta

Mizoram Pradesh Congress Committee (MPCC) president Lalsawta chuan Mizoram chu ṭang puihna hmangin mi taima leh thawkrimte hlawhtlinna ramah an siam dawn thu a sawi.

Nimina Congress Wokers Meet, Darlawna buatsaih a hmanpuinaah thu sawiin MPCC President chuan, "Ṭang puihna hmangin he ram hi mi taima leh thawkrimte hlawhtlinna ramah kan siam dawn. Ṭan nachang hre lote pawh ṭang turin kan zirtirin, kan fuihin, kan kaihruai ang. Taksa leh rilru lama harsatna neite, ṭang tura beisei theih lohte erawh an harsatna ngaihtuahpuiin, damdawi leh inenkawlna bakah an fate zirna thlenga buaipui sak an ni ang,” a ti.

Lalsawta chuan khawvel ram hrang hrangte'n neih inang kan neih chu ram leh mipui a nih thu sawiin, "Ram leh mipui enkawlna hi ram roreltute mawhphurhna lian ber a ni. Ram hruaitu a zirin ram a changkangin, a hausa thei. A enkawltu an dik loh chuan ram mipuite tan retheihna leh manganna thlentu an ni ṭhin," a ti a, North Korea leh South Korea ram dinhmun thlir chuan ram hruaitu nei ṭha leh ṭha lo dinhmun inthlauhna a lang chian thu a sawi.

India ram state ṭhenkhata thil thleng mek hmuhin Mizoram chu chhan tlak a la nih thu sawiin Lalsawta chuan, "Dik lo taka sum la luttuten sum siam belh an duh avangin sorkara mi pawimawh, minister leh MLA nih an rawn tum ṭan ta tlat mai. Hetiang mite hian sorkar hi sum siamna khawl ang lekah ngaiin MLA leh minister an nih theih nan inthlan dawnah lei tumin an rawn bei dawn che u. In vote lei tumtute hian nangmahni zawk kha a ni lei an tum chu. Lo hnawl ula, lo ti zak rawh u," a ti.