Minister-in sorkar laipui a dawr

New Delhi-a cham mek minister C Lalrinsanga chuan September 14, Nilaini leh nimin khan a department enkawl kaihhnawihah sorkar laipui hotute a kawm.

C Lalrinsanga hian Nilaini khan DoNER minister Kishan Reddy kawmin, agriculture infrastructure lama Mizoram mamawhte a thlen a ni. Mizoram sorkarin agriculture lamah hmasawnna bung thar kai tumin nasa takin hma a la tih sawiin C Lalrinsanga chuan, "Tun ṭumah pawh hian North East state zingah Mizoram chuan agriculture-ah ti ṭha ber lawmman a la hial a, hmasawnna nasa zawka kalpui tur chuan agriculture infrastructure lamah mamawh tam tak kan la neihte hi sokar laipui scheme piah lama kalpui a ṭul a ni,” a ti.

DoNER Minister chuan theihtawpa hma a lakpui tur thu a lo hrilh a ni.

National Productivity Council (NPC)-in an sawm angin C Lalrinsanga hian NPC director general Sundeep Kumar Nayak leh a thawhpuite chu NPC committee room-ah a kawm a; Mizoramin agriculture, irrigation leh cooperative sector lamah hmasawnna nasa zawk a neih theih dan tur leh hemi kawnga NPC nena thawhho theih dan tur hrang hrang an sawiho.

NPC hotute chuan, Mizoram chu Agri Business leh Business Process re-engineering-ahte thawhpui tura an inhawn thu an lo hrilh a, inbiakna neih chhunzawm zel ni se, an ti.

Minister hi Agriculture additional director James Vanlalluaia leh assistant director Simon Rosanglianaten an ṭawiawm a ni.