YMA-in eiruk leh hlemhletna tireh tura Hmalak chungchang an rel dawn

Central YMA hnuaia rorelna sang ber dawttu Central Coordination Committee (CCC) Sep­tember 14, 2022-a CYMA Hall-a ṭhukhawm chuan Ocober 27, 2022-a 'YMA Rorel Inkhawm' agenda turte an thlifim a, agenda tura an pawm zingah ‘Eirukna leh hlemhlêtna a reh theih nan Central YMA-in tun aia chak zawkin hma la rawh se’ tih a tel.

CCC-ah hian YMA Rorel Inkhawm atana CEC, Sub-Hqrs YMA leh Group YMA aṭanga rawtna lûtte an thlifim a, agenda tur atana rawtna YMA khawih 10 leh sorkar khawih pathum an pawm. Rorel inkhawm agenda atana pawm bâk zingah ṭhenkhat chu CEC bawhzui turin an dah.

NHIDCL-in kawngpui a laih avanga ram leilung­in a tawrhna hrang hrang a reh theihna atana hmalâk rawtna lût chu CEC bawhzui mek a nih angin CEC kutah an dah leh a ni.

YMA Dan Bu ennawn tur atana rawtna lûtte chu CYMA gen. secretary Prof. Lalnuntluanga'n a pharh a, sawifiah ngai te a sawifiah nghal. Dan Bu ennawnna hi rorel inkhawmah neih a ni ang.

CCC ṭhutkhawma CYMA GS-in a tarlan dan­in, CYMA hnuaia ruihhlo do pawl Central Anti Drugs Squad-te chuan ni 5 chhungin heroin hâwng 5 leh beer can 101 leh ruihhlo dang tablet 326 an man tawh. Ruihhlo leh inhnamhnawih nia hriatte chu thuneitute hnenah hlan zel an ni.