Zirlai thar lawmna leh zir zote thlahna hun hmang

Mizoram Law College chuan nimin khan an college-ah zirlai lut thar lawmna leh zir zote thlahna, 'freshers' social cum felicitation' an buatsaih a, Higher & Technical Education (HTE) minister Dr R Lalthangliana'n a hmanpui. Minister chuan zirlaite chu an chawrchhuahna (background) inpawh hniam tir lo turin a chah.

Dr R Lalthangliana chuan, Mizoram Law College zirlaite chu Mizoram hmathlir an nih thu sawiin, "In lo chawrchhuahna chhungkua background in ang lo tak takte in ni maithei a, chungte chu in hlawhtlinna daltuah ṭan tir suh ula, pawthniamtu che u atan hmang suh ang che u," a ti a, thawhrimna in mi hausa leh rethei a thliar lo tih rilrua pu tlat turin a chah.

Dan leh hrai hre mi chu ram rohlu an nih thu sawiin Dr Thangtea chuan, "Tunlai khawvel changkanna hrang hrang karah dan hria chuan thil chinchang midangte aiin an hre zawk a, chu chuan nasa takin thil nawr kal kawngah te, dan pela thil ti lo tur tein a pui ṭhin," a ti a, dan hre mi chu civil service lamah pawh mamawhna a san thu a sawi.

He huna hian Mizoram Law College principal Prof. Rualkhuma Colney leh mi pawimawh dangte'n thu an sawi a; Minister hian LLB graduate thar top-10 hnenah lawmpuina a hlan. Student of the Year, NSS Award leh article inziahsiak lawmmante sem a ni bawk.

Law College hi kum 1983-ah din a ni a, kum 2004-ah Mizoram Law College tia hming thlak a ni. Kum 2013-ah provincialised a ni a, a din tirh aṭangin nimin thleng khan mi 665 in LLB an pass chhuak tawh. Tun dinhmunah zirlai 189 leh zirtirtu 13 an awm mek a ni.