A hun taka hlawh pe turin MPYCC-in sorkar an phut
Mizoram Pradesh Youth Congress Committee (MPYCC) chuan thuchhuah siamin, MNF kaihhruai sorkar chu a hnathawkte hlawh a hun taka pe tawh ṭhin tura an phut thu an tarlang.
Finance changtu chief minister Zoramthanga hnuaiah a hun takah sorkar hnathawkten hlawh an la ngai tawh lo nia tarlangin MPYCC chuan, "A lungchhiatthlak kan ti takzet. Sorkar hnathawk ten a hun taka hlawh la loa, thla chanve a ral dawn tawhah te hlawh an lak theih tur thu kan minister zahawm tak tak te zingah hmai uang taka TV leh chanchinbu lama puanzar tura an puang duh hial ta te phei hi chu thil zahthlak tawpah kan ngai a ni," an ti.
MPYCC chuan MNF sorkar hian a hnathawk te hlawh a hun taka a pek theih loh avang hian, sorkar hnathawk tam tak loan chi hrang hrang laten a hun takah an loan lak an rul thei lo nia tarlangin, "Hei hian bank lama an record ti chhiain, loan an puk leh zel na turah pawh nasa takin a nghawng buai mek Sorkar hnathawkte berin a hun taka hlawh an lak thin loh avang hian Mizo mipuite nasa takin min nghawng a ni," a ti a, sum lengvak a tlemin, mirethei zawkte a nghawng buai thu an sawi.
Congress sorkar kalta-ah kha chuan sorkar hnathawkte hlawh hi thla tawp niah emaw, thla thar ni khatah emaw a lut ṭhin nia tarlangin MPYCC chuan, "MNF sorkar kalmekah hi chuan group B leh C te hlawh hi ni 10 hmain a lut ngai meuh lo a, group A leh B te phei chuan ni 10 leh 20 inkar-ah hlawh an la ve thei ṭawk zel a ni," an ti.
MPYCC tarlan danin, sorkar hnathawkte hian a hun taka hlawh an lak theih mai loh bakah MNF sorkarna hnuaiah an hlawh aṭanga sum an dah ṭhat GP fundpawh an mamawh hunah an la chhuak thei ngai lo. Sorkar hnathawk pension tawhte pawh sorkara thil tithei tak an nih loh chuan an pawisa lak tur ang an lachhuak thei lo mek a ni.
Mizoram sorkar chu Covid-19 sum neih loh chhuanlama hmang tawh lo tura ngenin MPYCC chuan, "An duhna lamah leh anmahniin hlawkna an tel theih na turah chuan an theh chhuak pawp pawp thei reng. A michhawrte hlawh pawh a pek hleih theih loh mek lai a, SEDP cheng nuai 3 aia tlem lo ni lo, Rs. 25,000 sem a tum mek pawh hian Pu Zoramtanga kaihhruaiin kan ram an tih chhiat nasazia leh retheihna khura min hruai luh thuk tawhzia a ti lang chiang hle," an ti.