Union MoS-in official-te a kawm

Minister of State for Consumer Affairs, Food & Public Distribution and Rural Development Sadhvi Niranjan Jyoti chuan nimin khan Secretariat conference hall-ah, Food, Civil Supplies & Consumer Affairs department, Food Corporation of India (FCI) leh Bureau of Indian Standards (BIS) hotute a kawm.

MoS Sadhvi Niranjan Jyoti chuan, FCSCA hotute chu ration buhfai semnaah bûkna khawl a chhiat palhin bûk lung pangngaia buhfai buk ngei tur a nih thu a hriattir a,"Ration semna hmun ṭhenkhata bûr leh ṭinte an hmang ṭhin tih nimin lama ka zinnaah min hrilh a, hei hi phal loh hulhual a ni," a ti a, Supply hotute chu hma la turin a chah.

FCI in Mizoram hmun parukah kudam an neih thu an sawi chu MoS chuan, district tinah FCI kudam hi awm se duhthusam a nih thu a sawi. Hemi chungchang hi zirchiang turin FCI hotute a hrilh a, Mamit district chu aspirational district a nih angin ngai pawimawh hmasa turin a hrilh bawk.

MoS chuan Mizoramin a thei chi hrang hrang – lakhuihthei, dragonfruit leh thlai dang a tharte dahṭhatna tur cold storage tam zawk a mamawh thu te, hemi kawngah hian hmalak a ṭul thu leh a ṭul chuan amah pawhin Food Processing Ministry-a lo enkawl tawh ṭhin angin puih a inhuam thute a sawi bawk.

BIS hotute tarlan danin, Mizorama thilsiamna (factory) pariatin BIS certification an nei mek a, rangkachak kaihhnawihah a quality leh a dik leh dik loh finfiah ‘hallmarking’ chu mi pakhat hnenah pek a ni tawh bawk.