KHAWTHLIR

Thisen pe

Synod Higher Secondary School NSS chuan an sikul diamond jubilee pualin nimin khan school multipurpose hall-ah blood donation camp an huaihawt a, mipa 108 leh hmeichhia 16-te'n Civil Hospital, Aizawl tan thisen unit 124 an pe; vawiinah an pe chhunzawm leh ang. JC Security pawhin JC Security dintupa thih champha vawi 15-na pualin Synod Hospital-ah thisen unit 26 an pe a, petute mipa 23 leh hmeichhia pathum an ni.

Heroin man

Khankawn police checkgate-a duty-te chuan September 14, Nilaini zan khan Malsawmkima (20), Khawzawl Hermon Veng kut aṭangin heroin gram 27 an man. Heroin hi international market-ah cheng nuai 13.5 man hu a ni.

Faina sawiho

Lunglei Town Sanitation Task Force chuan nimin khan an chairman Kulothungan A, bawrhsap hoin DC conference hall-ah Mizoram Cleanliness Competition 2022 leh Swachh Survekshan 2023 atana inpuahchah dan tur leh Lunglei District-a Cleanliness Week 2022 hman dan tur an sawiho.

Minister-in tlawh

Environment, Forest & Climate Change minister TJ Lalnuntluanga chuan September 14, Nilaini khan Champhai EFCC Complex-a Conservator of Forest (CF) Eastern Circle office a tlawh.

Science Congress

Kolasib DC John LT Sanga chuan nimin khan IPR conference hall-ah Samagra Siksha leh Science Teachers Association Mizoram (STAM) te buatsaih 30th District Level Children’s Science Congress, 2022 a hawng. Thupui atan ‘Understanding Eco-System for Health & Wellbeing’ tih hman a ni.

Ruahmanna pawm

Lawngtlaia DAY-NULM City Level Executive Committee chu an chairman Amol Srivastava, bawrhsap hoin nimin khan an ṭhukhawm a, Scheme of Shelter for Urban Homeless (SUH) hnuaiah Christian Hospital Lawngtlai rama Rs 46,79,600 hmanga sak tur Patients' Attendant Shelter (PAS) atana ruahmanna an pawm.