MLA-in ruang vawnṭhatna hawng

Chaltlang Branch YMA in an kum 75 tlin puala an veng thlanmuala mitthi ruang vawnṭhatna (refrigerated mortuary) an dah thar chu nimin khan bialtu MLA Vanlalhlana'n a hawng.

Refrigerated mortuary hi MLA fund Rs 2,00,000 senga lei a ni a, a dahna hmun sak nan Vanlalngaihsaka, IAS (Rtd) te chhungkua in Rs 70,000 an pe a ni.

Vanlalhlana chuan, "Ruang vawn-ṭhatna hi kan mamawh tih pawh kan hriat loh laia kan mamawh em em a lo ni a, hmalatu YMA hruaitute an fakawm tak zet, " a ti a, hmasawnna hna thawh kawngah a bial chhung mipui tan theihtawp chhuah zel a tum thu a sawi.

Ruihhlo leh eirukna in Mizote a chiahpiah hneh hle nia sawiin Vanlalhlana chuan,"Mahni vei veiin kan vei a, tunah hian ruihhlo leh eirukna do tura YMA in ke pen a tum ta hi lawmawm ka ti hle," a ti a, ruihhlo leh eiruknate tireh tura nasa taka hma lak a ṭul thu a sawi.

Central YMA president R Lalngheta pawhin thu sawiin, YMA in ruihhlo a dona turah sawiselna awm theite haiderin ram leh hnam tan theih tawp chhuah an tum thu a sawi bawk.

He huna tarlan danin, Chaltlang refrigerated mortuary-ah hian ruang pahnih dah theih a ni. Ruang hi ni/zan thum atan dah theih a ni a, veng pawn mi leh hnam dang tan pawh dah theih niin, Chaltlang Branch YMA Executive Committee hnenah dilna thehluh a ngai thung. Veng chhung mi tan a tlawnin ruang a dah theih a, veng dang/hnam dang tan an dilna pawm a nih hnuah ni/zan khat atan Rs 2,000 leh a aia rei dah tur tan ni/zan khatah Rs 1,000 zelin a pung ang.