Union Minister hnenah harsatna thlen

Irrigation and Water Resources minister C Lalrinsanga chuan September 15, Ningani khan New Delhi-ah Union Power and Renewable Energy minister RK Singh chu a pisaah a kawm a, PM-KUSUM kalpui dan chungchanga Mizoram mamawh leh harsatnate a thlen.

C Lalrinsanga chuan Union Minister hnenah hian PM-KUSUM hnuaia solar water pump vendor tura sorkar laipuiin a thlante'n benchmark cost a hniam tia hna an ṭan duh loh avanga Mizoram loneitute'n harsatna an tawh mek chu a rang thei ang bera sutkian a ṭul thu a hrilh a, "Mizoram leh hmarchhak state ṭhenkhatte tan rate ṭha zawk siam a nih loh chuan vendor ṭha hmuh zawh loh mai a hlauhawm, " a ti a, ram dang depa awm Mizoram tana sorkar laipui hnathawh ṭhat dan chu ṭhenawm ramte laka India ram hmel lan chhuah dan pawimawh tak a nih thu a sawi.

Union minister RK Singh chuan PM KUSUM hnuaia solar water pump atana rate an lo duan tawh chu Mizoram leh hmarchhak state dangte tan siamṭhat a nih tur thu a lo hrilh a, "Rate awmsaa tender chhang a, hna pawh hmu tawh tu vendor thawk ṭha leh duh si lote chu blacklist an ni ang," a ti.