Saitual khawpui teh ṭhatna tur hawng
Land Revenue & Settlement (LRS) minister Lalruatkima chuan, nimin khan Saitual College-ah SEDP hnuaia Saitual khawpui huam chhung zawng zawng tehṭhat (survey & resurvey) neih tur a hawng. Survey & Re-Survey of Saitual Town atan hian SEDP aṭangin cheng nuai 52.81 ruahman a ni.
Lalruatkima chuan Saitual khawpui leh a chhehvel survey tur chu Mizorama a hmasa ber tur a nih avangin hun chhinchhiah tlak tak a nih thu a sawi a,"Survey & Re-Survey of Saitual Town atana sum sen tur cheng nuai 52.81 SEDP kaltlanga min petu Finance minister Pu Zoramthanga chungah kan lawm takzet," a ti a, survey chuan Saitual, Sihfa, Keifang, Ruallung leh Rulchawm a huam dawn thu leh khaw dang pawh a ṭul anga hmalak chhoh zel a nih a beisei thu a sawi.
Saitual district bakah Hnahthial leh Khawzawlah pawh Land Revenue & Settlement department in pisa an nei tawh tih sawiin Lalruatkima chuan,"He survey & re-survey hi a theih ang angin kalpui tum a ni. Saitual hi a hmahruaitu (pilot) a ni a, he thil hian nasa takin mipuite chanvo a humhalh dawn a, mumal takin land records pawh kan neih phah dawn," a ti a, ram neitute chu an ram neihte cheibawl ṭha tur leh ramri chhinchhiahna felfai tak nei turin a chah nghal.
Saitual DC VL Hruaizela Khiangte pawhin thu sawiin, "Saitual khawpui hi a hmun a rem bakah a laili a, LRS dept.-in survey neihna tur pilot project model town atan hman a ni chu thil inhmeh tak a ni. Survey hi uluk leh fimkhur taka tih a ngai a, vawikhat tihsual chuan a pawi thui ṭhin avangin a bul aṭanga a tawp thlenga tha thlah lo leh ṭang mar pata hnathawk turin survey neih a ngai. DC ka nihna ang pawhin a ṭul a nih phawt chuan theihtawp chhuaha lo ṭanpui ka inhuam a ni," a ti.
Survey & Re-survey hna hi Buannel Geo Solutions & Services in a thawk dawn a, Saitual, Keifang, Rulchawm, Ruallung leh Sihfa khuaahte he hna hi kalpui a ni ang. In nei si pass la nei lo te, land allotment thar tur te, ram survey tawh la regularize loh te, sorkar, kohhran leh tlawmngai pawl ramte leh hmunhmate survey tur a ni.