Kan CM hoin kan nui hluah hluah Nuih chhuah engmah kan nei lo - MBJP President

Mizoram BJP president Vanlalhmuaka chuan, Mizoram chu kan Chief Minister hoin kan nui hluah hluah a, mahse engmah nuih chhuah kan neih chuan loh thu a sawi.

Vanlalhmuaka chuan nimin khan BJP office-ah thu sawiin, Mizoram politics chu a buaithlak tiin, "Thu tak hian hmun a chang lo a, dawt hi kan tuipui hle a ni. Thil tak tak kan ngaihtuah ngai loa, kan nui nasa lutuk te hian thil tak tak kan ngaihtuah loh zia a ti lang chiang. Tunah pawh CM ho hian kan nui hluah hluah a, nimahsela engmah nuih chhuah kan nei lo a ni," a ti.

Kan nuih luih luih laiin ṭhenawm state-te chuan hmasawnna kawng an zawh mup mup thung nia sawiin MBJP President chuan, "Kei chu kan ram ka ngaihtuah hian ka nui hleithei lo a ni," a ti a, Mizoramin hruaitu ṭha ram hmangaih tak tak tu, ngaihtuahna seng tak taktu a mamawh tawh hle niin a sawi.

MBJP President chuan missionary nuai khat tirh chhuah aiin, Mizorama chhungkaw nuai khat dinchhuah tir a ṭha zawk tih sawiin, "Tih tur sawi ṭeuha tih leh si loh hi engmah a ni lo tih hi kan ram hian hre thar leh ang u. Tun hunah hian Mizoram hian kan ram leh hnam dinchhuahna tur tak tak kan ngaihtuah a ngai tawh," a ti.

Mizoram sorkar chuan Union Minister hnenah PMAY hnuaia insak ṭanpuinaah 40% siam zawh tawh tia an report thu sawiin Vanlalhmuaka chuan, "60% an la zawh loh chu thla hnih hnuah kan zo vang tih an report a ni," a ti a, Union Minister chuan kum li chhung pawha 40% chauh ti theiin thla hnih chhunga 60% an zawh theih a ring lo hle niin a sawi.

BJP-in sorkarna an chang a nih chuan PMAY la dawng lote hnenah thla ruk chhungin PMAY aṭangin in an sak sak tur thu sawiin, "Chutihrual erawh chuan an insakna tur sum tichingpentute erawh chuan an tihsual man an tawrh ngei theih nan CBI kan chhui tir dawn a ni," a ti.