Mizoram mipuite hian sorkar ṭha kan siam ve thei tih hriat a ngai - MPCC President

MZU-a Department of Political Science chuan nimin khan MZU-ah political talk an buatsaih a, an hun hmanpuitu MPCC president Lalsawta chuan Mizoram mipuite'n sorkar ṭha an siam ve thei reng a ni tih hriat a ngaih thu a sawi.

Lalsawta chuan 'Chhura chengkek lo tur, Nahaia a nih loh vanga lo thei lo emaw inti tlat' ang deuhin ram dangin an tih theih hi Chhura emaw intiin ti thei ve loah kan in ngai tlat ṭhin nia sawiin, "He kan rilru puthmang hi siamṭhat a hun tawh takzet a ni. Chhura emaw inti tlat ṭhin Mizoram mipuite hian sorkar ṭha hi kan siam ve thei reng a ni tih kan hriat a ngai," a ti.

Environment humhalh leh mihring rilru leh nunphung a ṭha zawnga hruaite hi ram leh hnam hmasawn nan a pawimawh tih sawiin MPCC President chuan, "Hma­sawn kan duh avang hian kan envi­ronment hi a chhe kher tur a ni lo," a ti a, environment humhalh chungin hma­sawnna kalpui tur a nih thu a sawi.

Lalsawta chuan hmasawn tur chuan sorkar ṭha leh dan rorelna a pawimawh em em thu sawiin, "Rom sorkar, Nero-a rorel lai chuan Nero-a rilru ang ang kha dan a ni ringawt. Bihar-ah Laloo-a rorelna hnuaiah dan rorelna a awm lo a, Nitish Kumar-a hnuaiah chuan dan ang taka rorelna awmin, nasa takin hma an sawn phah ta reng a ni," a ti.

Sorkarin engkim tih a tum hian a buaithlak tih sawiin MPCC President chuan, "Sorkar hi sumdawng emaw a intih phei chuan buaithlak tak a ni ṭhin," a ti a, hmasawn duh chuan mithiam leh a nachang hria, a thiam leh a titheite kutah thil tam tak dah ngam tur a nih thu a sawi.

Lalsawta chuan ram hmasawnna atan chuan inenkawlna ṭha a pawimawh ber tih sawiin, "Ram hmasawn leh hmasawn lo pawh hi inenkawlna ṭhat leh ṭhat loh vang mai mai a ni. Mipui hi chhiah petu kan ni a, sorkar chu kan chhiah pek tlingkhawm hmanga hmasawnna hna thawktu a ni thung," a ti a, chhiah pek tlingkhawm hmanga sorkar inenkawl dan ngun taka vil a pawimawh thu a sawi.