Covid-19 vei 44 hmuh belh a ni

September 14, Nilaini khan Mizoramah Covid-19 vei mi 44 hmuh chhuah a ni a, nimin khan hripui vei dam tawh mi 31 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 243 an awm.

Thawhlehnia hripui vei hmuh thar mi 44 chu mipa 24 leh hmeichhia 20 niin, RAT hmanga hmuh chhuah 43 leh ZMC RT-PCR hmanga hmuh pakhat an ni. Hri vei hmuh tharte hi swab sample 303 endik aṭanga positive zat chu 14.52% a ni.

Nimin khan hripui vei dam tawh mi 31 an chhuak a; district tina chhuak zat chu - Aizawlah 15, Mamitah 10, Lungleiah pathum, Kolasibah pahnih leh Hnahthialah pakhat an ni.

IDSP record angin, Mizoramah Covid-19 vei 2,37,978 hmuh chhuah a ni tawh a, mipa 1,10,849 leh hmeichhia 1,27,129 an ni a, mipa aiin hmeichhia 16,280-in an tam zawk. Nimin tlai dar 5 thleng khan mi 2,37,013 (99.59%) chhuahtir an ni tawh a, mi 722 (0.30%) thi tawhin, enkawl mek mi 243 (0.11%) an awm.

Kum 2011 chhiarpui angin, Covid-19 vei hmuh tawh 2,37,846 chu state mipui zat aṭangin 21.80% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.