KHAWTHLIR

Sikulte puihna tur Hawn a ni
Lawngtlai DC Amol Srivastava chuan nimin khan DC conference hall-ah sikulin harsatna a tawh leh a mamawhte, zirna tihhmasawn nana thil ṭul hriatpui a, chin felsak leh an mamawh anga kaihhruaina, thuràwn leh ṭanpuina pek theih nana ruahman 'Adopt a School' project a hawng. DC chuan sikul mal leh Education department aṭanga hma lak theih bak piah lamah district administration aṭanga hma lakpui ngai thil a awm ṭhin avanga project hi kalpui a nih thu a sawi.

MRB branch
Lunglei district bawrhsap Kulothungan A chuan nimin khan Ṭawipui South khuaah Mizoram Rural Bank (MRB) branch thar a hawng a, Mizorama MRB branch 101-na a ni. Hawnna inkhawmah hian MRB chairman V Jaya Chandra pawh a tel.

Inhrilhfiah
Khawzawl Krishi Vigyan Kendra (KVK) chuan nimin khan chhungkaw tinte'n taksa mamawh ang chaw ṭha an ei theihna tura chuktuah huan siam pawimawhna leh thing phun pawimawhna inhrilhfiahna 'National Campaign on Poshan Abhiyaan & Tree Plantation Programme' an buatsaih a, anganwadi workers leh kuthnathawktu mi 43 an tel.

DC-in hawng
Lunglei district bawrhsap Kulothungan A chuan nimin khan Ṭawipui S khuaah mipuiin sorkara an mamawhte an thlen theihna tur 'Mipui hnenah kal rawh - go to the people' project a hawng a, Lunglei district-a sorkar department/ bank 12 telin mipui tan service 20 chuang an pe a ni.

Ruihhlo man
Zokhawthar Police Station-a duty-te chuan September 15, 2022 khan Zokhawthar aṭanga Aizawl pan tur lirthei (sumo) Biaklala (30), Bawngkawn, Aizawl khalh lai aṭangin heroin gram 55 an man a, hemi ni vêk hian lirthei (sumo) dang Lalthankunga (33), Sesawng, tuna Ṭhuampui, Aizawla awm mek khalh aṭangin heroin gram 133 an man bawk. Heroin hi sound woofer box chhunga thuhruk ve ve a ni.