CM ngenna anga union budget-a dah Bamboo link road buaipui mek a ni

Chief minister Zoramthanga ngenna anga kum 2022-2023 union budget-a dah bamboo link road siam turin Mizoram sorkar chuan a ṭul angte a buaipui mek. Bamboo link road atan hian cheng vbc. 100 dah a ni.

Kum 2022-2023 union budget-ah hian hmarchhak state-te tan Prime Minister’s Develop­ment Initiative for Northeast (PM-DevINE) hnuaiah cheng vbc. 1500 dah a ni a, heta ṭang hian Mizoram tan bik bamboo link road-ah cheng vbc. 100 leh Aizawl by-pass road on western side atan cheng vbc. 500 dah a ni. State dang tan a bika dah a awm lo.

Tarlan fo tawh ṭhin angin Chief Minister hian Mizoramin bamboo link road a mamawh thu hi Prime Minister, Finance Minister, minister dang leh official-te hnenah ṭum eng emaw zat a sawi a, kum 2022-2023 union budget-ah dah a ni ta a ni.

Vanglaini zawhna chhangin adviser to chief minister (technical) K Lalsawmvela chuan bamboo link road leh Aizawl by-pass road on western side atana Mizoramin a lo tih lawk ve theih ang chu February/March vel khan an peihfel tawh thu a sawi a, "Mah se, a guideline central aṭangin kan dawng lawk loa, guideline awm loa kan ruahman­nate zuk theh thlak ngawt awmzia a awm chuang lo a ni," a ti.

K Lalsawmvela chuan tunhnai teah guideline hi an dawn thu sawiin, "A guideline-a tih tur ṭul leh pawimawh tarlante buaipui nghal char char a ni a, peihfel a nih velah central lamah theh thlak niin, anni lamin an pawm hunah sanction hmuh a ni ang," a ti a, Mizoramin DPR a siamte chu DoNER Secretary kaihhruai committee-in an endik tur thu a sawi.

Chief Minister chuan bamboo link road atana sum hmuh cheng vbc. 100 chu pilot project tura tih a nih angin, sorkar laipuiin awlsam zawka an lo enfiah theihna tur Aizawl khawpui bul hnai lui ruam rem ṭhaahte hman phawt a nih dawn thu February 2, 2022 a thuthar thehdarhtute a kawmnaah a lo sawi tawh a ni.

Zoramthanga chuan, sorkar laipui hotute hnenah Mizorama mau kawng kam leh kiua put phâkte chu lâk zawh a nih tawh avang leh raw material awm loh avangin industry-te pawh khâr a nih thu a hrilh tih sawiin, "Tuna maute chu a puta put chhuah dawn chuan a to dawn lutuk a, kawng siam a ngai a ni," a ti a, kawng siamna atana pawisa pe turin sorkar laipui hotute nasa taka a kar thu a sawi.