A thlawna thisen pek runpui buatsaih

India ram hmun dang rualin Septem­ber 17, 2022, Inrinni khan Mizo­ramah pawh a thlawna thisen pek runpui (Raktdaan Amrit Mahotsav) buatsaih a ni a, he hun pual hian Health minister Dr R Lalthangliana hoin Aizawl Civil Hospital blood bank-ah hun hman a ni.

Health Minister chuan a thlawna thisen pek runpui atana sorkar laipuiin hun bik a buatsaihah Mizoram pawhin theihtawp a chhuah tih sawiin, "Mipuiten a thlawna thisen pek pawimawhzia leh hlutzia hriaa uar leh zuala thisen pek kawnga ke an pen thar lehna ni thei se a duhawm hle. Mizorama district 13 zinga blood bank awm lohna district pathumah blood bank a awm ngei theih nan vawiin programme denchhenin ṭanlak ni se," a ti a, Association for Voluntary Blood Donors Association-te chu district pathumah hian branch hawng turin a ngen nghal.

Mizoramin vanneihna nasa tak a neih chu khawtlang, kohhran leh mipui mimir ṭanrualna a nih thu sawiin Dr R Lalthangliana chuan, "Covid-19 leng do let chungchangah pawh mipui ṭanrualna pawimawhzia a lang a ni. Mihring nunna chhan nana thil pawimawh tawpkhawk, kristian kan nih ang pawha rawngbawlna pawimawh, a mamawhtute tana a thlawna thisen pek hi uar leh zual ila, Mizoram hi India ram puma tiṭha ber kan nih theihna turin mipuite'n theihtawp i chhuah ang u," a ti.

Raktdaan Amrit Mahotsav hian October 1, 2022 thleng a awh dawn a, a ṭan niah hian mimal leh pawl hrang hrangten a thlawnin thisen an pe. He hun hman chhung hian thisen pek lam inzirtirnate neih a, ram mipuite thisen pek a ṭulzia in hrilh hriat a, poster leh banner-te tara hun hman tur a ni.

Inkhawma tarlan a nih danin, kum 2021-2022 chhung khan Mizoram pumah thisen unit 28,191 lakkhawm a ni a, chung zinga 25396 (90.08%) a thlawn (voluntary) a dawn a ni. Kumin April aṭanga June thleng khan thisen unit 8,842 lakkhawm tawh niin, chung zinga 8203 (92%) chu mi tlawmngai, a thlawna thisen petute pek a ni.