Covid-19 an chhuanlam laiin an duhsak zawngte An vur nasatzia a lang chho zel - MPCC Media

MPCC Media dept. chuan September 17, Inrinni khan thuthar thehdarhtute an kawm a, MNF sorkari Covid-19 chhuanlama sum harsat thu an sawi ṭhin laiin, an duhsak zawngte an vur nasatzia a lang chho zel niin an sawi.

MPCC Media chair­man Dr Lallianchhunga chuan Mizoram sum leh pai enkawlna kawngah MNF sorkar talbuai dan a thuk tawh hle nia sawiin, "Kum hnih khat lek chhunga siamṭhat mai theih tawh loh tur khawpa dinhmun chhiaa a din tawh avangin an dinhmun hrethiam chin MNF minister-te chuan finance chungchang engmah an sawi duh tawh lo. Minister leh MLA tam zawk chu an ngawi ṭhup tawh a ni," a ti.

MNF Legislature Party (MLP) secretary L Thangmawia chuan September 14, 2022 khan thuthar thehdarhtute a kawm thu sawiin Dr Lallianchhunga chuan, "MPCC Media press conference thuken min nemnghehpui bakah kan thu leh hla min thehdarhsakna a nih avangin a chungah kan lawm hle," a ti.

MPCC Media Chair­man sawi danin, MLP Secretary hian April 1, 2019 leh July 14, 2022 inkara nuai 100 chin chunglam bill, treasury-a thehluh ni la la-a pawisa lakchhuah nghalna bill 105 a awm thu leh ni khata treasury-a lehlan thei, mi thil ti thei bikte bill belhkhawm chu cheng vbc. 591 lai niin a sawi a ni.

Hei hian MNF sorkarin Covid-19 chhuanlama pawisa a harsatna a tawh thu a tlangaupui mek laiin, an duhsak zawngte a ruka an lo vur nasat zia chiang takin a ti lang chho zel a ni.

MNF party worker-te leh contractor tam zawkin an hnathawhna bill an lak theih loh lai leh PMGSY contractor tam zawkte'n bill vaibelchhe 200 chuang an lak theih loh avanga an hnathawh pawh an chhunzawm theih loh laiin an duhsak zawng contractor-te contract pek leh bill pek kawngah chuan harsatna an tawk miah lo tih MLP Secretary thusawi aṭang khan a lang chiang zel niin an sawi.

Dr Lallianchhunga chuan Mizoram tana zalenna sualtu inti leh hnam party inti, MNF party sorkarna hnuaia ni khata bill lehlan thei zinga che thei ber chu SLT Infracon Pvt. Ltd, Silchar an nih thu sawiin, "Anni hian bill 9 lai chu awlsam takin an thehluh ni la lain an la nghal thei," a ti a, hnamdang company Ratna Infra, Hyderabad leh M/S Bhavya Construction, Silchar-te pawhin an bill 4 ve ve ni khatah an lehlan theih thu a sawi.

Zoramthanga fachuam, a vangvat kaipuite ai pawha a duhsak zawk Kamrul-a pawhin treasury-ah bill pathum a lehlan pui thei nia sawiin MPCC Media Chairman chuan, "RTI chhanna aṭanga a lan danin Kamrul-a bill hrim hrim hi treasury-ah thla khat aia rei a tang ve ngai meuh lo," a ti.

Hetiang a nih lai hian sorkar hnathawkte chuan tunhma angin a hunah tak hlawh an la thei lo tih sawiin Dr Lallianchhunga chuan, "Sorkarin pension-a chhuak mi 1,367 te pawisa a batsak pawh cheng nuai 24,987.07 a tling tawh. GP Fund an la hleithei hek lo," a ti a, hnamdang company leh Kamrul-a'n bill an lak reng theih laiin health care bill ba tlingkhawm pawh cheng vbc. 77 a tlin tawh thu a sawi.