PMAY(G) chungchang sawifiah ; State-in sum bat a nei lo - RD Minister

Rural Development (RD) minister Lalruat­kima chuan in nei lote tana in sak ṭanpuina Pradhan Mantri Awaas Yojana (PMAY) Gramin chungchang a sawifiah a, state-in PMAY (G) sum bat a neih loh thu a tarlang. Tarlan tawh angin Union RD Minister chuan Mizoram sorkarin PMAY kalpui muang a tih thu tunhnaia Mizoram a rawn tlawh ṭumin a sawi a, Mizoram sorkar chu a tih turte ti chak ve turin a phut a ni.

Lalruatkima hian thu­chhuah siamin, sorkar laipui scheme PMAY-G chu Mizoramah pawh April 1, 2016 hman ṭan a nih thu a tarlang a, "He scheme hnuai­ah hian PMAY-G pang­ngai Awaasoft-ah insak ṭanpui­na dawng thei chhung­kaw 13,532 an awm a, vawiin thlengin chhung­kaw 10,532 hnen­­ah 1st installment leh chhungkaw 6,615 hnen­ah 2n installment, chhung­kaw 6,373 hnenah 3rd installment leh chhung­kaw 5,894 hnenah 4th installment pek tawh niin, chhungkaw 5,999 ten in an sa zo tawh," a ti.

Lalruatkima chuan a tira PMAY-G dawng thei tur chhungkaw 13,532 bakah kum 2018 khan a belhna turin Awaas+ survey neih a nih thu sawiin, "Chumi aṭang chuan sorkar laipuiin chhungkaw 6,980 thlan min phalsak leh a ni a, anni hian ṭanpuina hi an dawn theihna atan registration leh administrative sanction buaipui mek a ni. Tun dinhmunah chhungkaw 5,381 register tawh niin, chhungkaw 2,598 tan administrative sanction software-ah tihfelsak an ni tawh. Central aṭanga fund hmuh veleh ṭanpuina an dawng thei ang," a ti.

Installment la dawng kim lote hnenah ṭanpuina installment hrang hrang pek mek zel a nih thu tarlangin RD Minister chuan, "Central aṭanga fund kan hmuh tluan ṭhat theih chuan heng la dawng kim lote pawhin an dawn kim thuai theihna atan sorkar chuan chak takin hma a la mek a ni," a ti a, PMAY-G hnuaiah hian insak ṭanpuina hi installment li - ṭum thum Rs 39,000 vek leh ṭum khat Rs 13,000-a sem tur a nih thu a sawi.

RD Minister chuan Ministry of Rural Development aṭangin PMAY-G hmalak tihchak-na tur administration fund hun rei tak state sorkarin a dawn tawh loh thu tarlangin, "Field leh village-a a taka PMAY-G viltu official-ten inspection leh geo-tagging an tihna tur transportation cost pawh tunah hian admin. fund dawn loh avangin harsatna nasa tak an tawk a ni. Hemi chungchang hi MoRD-ah vawi tam ziak leh ṭawngka-a thlen a ni tawh a, dawn a nih hunah chak zawkin kalpui a ni ang," a ti.

PMAY-G registration, sanction leh beneficiary-te account-a fund transfer-te chu online MIS Awaasoft software leh PFMS hmang veka kalpui a nih avangin technical problems hrang hrang an tawh zin thu tarlangin Lalruatkima chuan, "Heng technical issue-te hi central lama NIC technical experts leh MoRD hotute hnenah thlen a ni ṭhin," a ti a, ral aṭanga chinfel theih loh tam tak a awm ṭhin avangin June, 2022 pawh khan state aṭangin MIS Nodal team-te chuan Delhi-ah an zuk kalchilh thu a sawi.

Lalruatkima chuan sorkar laipui aṭanga sum hmuh cheng nuai 4,191,69 chu ni 13.7.2022 khan state nodal account-ah a lut tih tarlangin, "State-in a tumve tur cheng nuai 465.74 pawh ni 8.9.2022-ah hmuh a ni tawh. State sorkarin PMAY-G sum bat a nei lo a, a doletna SMS pawh a pe chhuak vek tawh. Fund hi sem chhuah mek a ni a, tuna awm mek aṭang hian beneficiary zahve aia tamin in an sa zo the tura beisei a ni. A bakte pawh central aṭanga fund hmuh a nihleh velah chak taka chhunzawm turin ruahmanna siam sa vek a ni tawh," a ti.