Social media hmansualna a nasa - Law & Judicial Minister

Mizoram Chakma Students Union (MSCU) chuan September 17, 2022 khan zirlai thar lawm­luhna leh zirlai tiṭha chawimawina hun an buatsaih a, an hun hman­puitu Law & Judicial minister TJ Lalnuntluanga chuan social media hman­sualna a nasat thu a sawi.

Law Minister chuan tunlaiah social media-in kan khawvel leh khawtlang a nghawng nasat thu sawiin, "Thil ṭangkai a nih rualin hmansualna pawh a tam tawh. Rilru hrisel tak pu chunga thil ti a, mite rilru tina zawnga dawt thu rawng kai social media-ah tive lo ang che u," a ti a, zirlai naupangte chu a ṭul loa social media buaipui lo turin leh an hun leh tha khawhralna atana hmang lo turin a chah.

Chakma, dan loa lo lutte chu Mizoram tana hnawksak mai ni loin an mahni Mizorama Chakma tan pawha hnawksak an nih sawiin, "In hamṭhatna dawn theihte pawh anmahni vangin in chan ṭhin. Heng dan loa lo lutte bei let tur hian i ṭang tlang ang u," a ti.