Faina beihpui thlak ṭan a ni

Faina beihpui thlakna tura sorkar laipuiin Youth Rally a buatsaih chu September 17, Inrinni khan deputy chief minister Tawnluia'n Zodin Square-a Mahatma Gandhi Memorial lim bul aṭangin a vailiam. Rally hi district hrang hrangah pawh neih a ni.

Youth Rally hi September 17 - October 2, 2022 chhunga neih tur Swachh Amrit Mahotsav hnuaia hmalakna hmasa ber 'Indian Swachhata League' denchhena buatsaih a ni.

Tawnluia chuan Youth Rally in a tum ber chu India ram khawpui bawlhhlawh awm lohna 'garbage free city' a siam a nih thu a sawi a, "Hemi kawngah hian ṭhalaite kaihhruainaa beihpui thlak a ni. Bawlhhlawh awm loa thianghlim taka kan khawpuite siam a nih theih nan leh ṭhalaite cho chhuah hi a tum ber a ni," a ti a, Mizoram khawpuite fai leh thianghlim taka siam chu mi tin mawhphurhna a nih thu a sawi.

Mizoram chu fai, nuam leh thianghlim tak 'Garbage Free Mizoram' a siam tura mi tin sawmin Tawnluia chuan, "Faina kawnga sorkar hmalaknate hi mipui ṭawiawmna leh pawl hrang hrangte thawhhona tel lo chuan a hlawhtling tak tak thei lo," a ti.

Aizawla Youth Rally-ah hian team pathum - Hrangbanna College NSS, Pachhunga University College NSS leh T Romana College Adventure Club -te an tel a, an vaiin zirlai 250 vel an tel. Zirlaite hian faina thutiam an tiam vek a, slogan writing competition buatsaih niin, October 2, 2022-ah result puan a ni ang.

He hunah hian MLA pahnih C Lalmuanpuia leh K Laldawngliana, AMC mayor Lalrinenga Sailo leh councillor Lalfakzuala Chenkual bakah, UDPA secretary Lalmalsawma Pachuau leh UDPA director H Lianzelate an tel.