Robert Romawia'n sorkar laipui hotute hnenah Mizoram mamawh hrang hrang a thlen

New Delhi-a cham mek minister of state Robert Romawia Royte chuan September 16, Zirtawpni leh September 17, Inrinni khan a department enkawl kaihhnawihah sorkar laipui hotute a kawm a, Mizoram mamawh hrang hrang a thlen.

Information & Communication Technology (ICT) minister Robert Romawia hian Zirtawpni khan Ministry of Electronics & Information Technology hotute a kawm a, cheng nuai 4,000 senna tur Digital Mizoram project chu sanction ran a nih theih nan Finance Ministry-ah recommendation pe rang turin a ngen.

Sports Minister hian Ministry hrang hrangah PMJVK chungchang a thlen bawk niin sorkar thuchhuah chuan a tarlang a; installment ṭhenkhat release tura Mizoram sorkar rawtnate thehlutin, hun rei lote chhungin cheng nuai 10,200 chu release an tum thu an lo hrilh bakah, sum hman chak dan azirin a dang pawh an release zel tur thu an lo hrilh niin a tarlang.

REC Chairman & CMD Vivek Kumar Singh hnenah CSR kaltlanga Mizoram tana Motorsports Racing Tract buatsaihna tur cheng nuai 700 an pek avanga lawmthu hrilhin Robert Romawia chuan, "Chak takin hna thawh mek a ni," a ti a, CSR aṭanga sanction tura tourist bus pathum leh tourist car pakhat an dil pawh tifel vat turin a ngen nghal a ni.

Inrinni khan Tourism Minister hian Ministry of Tourism-a senior officer-te a kawm a, Mizoram tana PRASAD projects sanction vat dan tur te, Ministry of Tourism in Swadesh Darshan sum a pek chhuah ran dan tur te, Mizorama golf tournament siam dan turte leh Mizorama tourism khawmpui lian International Tourism Mart (ITM) neih dan turte an sawiho.

Sorkar thuchhuah tarlan danin, Union Tourism secretary Arvind Singh chuan Tourism Minister rawtnate chu tihhlawhtlin an tum tur thu a lo hrilh bakah, Mini PRASAD scheme aṭangin project pathum a pawm nghal a ni.