Agriculture dept.-in lawmman dawngtu an minister Lengpuiah an lo hmuak

Mizoramin September 14, 2022-a New Delhi-a 'Best performing State in Agriculture among the North East States' lawmman a dawn chu September 17, Inrinni khan Lengpui Airport-ah Agriculture minister C Lalrinsanga'n a rawn thlenpui a, Agriculture Development Board leh Agriculture department hotute'n an lo hmuak.

Hmuahna inkhawm hi Agriculture secretary J Hmingthanmawia'n a kaihruai a; minister C Lalrinsanga chuan, “He lawmman hian phurna thar leh chona thar min pe a, kan hmalakna tlâwmtê, uanpui tham miah loh hmangin Pathianin kan ram a chawimawiah ka ngai. He lawmman hian kan chief minister Pu Zoramthanga leh a sorkar a chawimawi em em niin ka hmu," a ti a, loneitute chu taima leh rinawm taka hna thawk zel turin a chah nghal bawk.

Best performing State in Agriculture among the North East States Award hi Outlook Group in Association with Indian Council of Agriculture Research (ICAR) leh Ministry of Agriculture and Farmer's Welfare te buatsaih a ni a, award semna atan hian endiktu (jury) panga - National Rainfed Area Authority CEO, Padma Bhusan Awardee pakhat, South Asia International Food Policy Research Institute Director, National Productivity Council Director General leh Sahakar Bharti National President te an awm.

Endiknaah hian tehfung hrang hrang - kut hnathawktute tih phûr dan, CSS kalpui dan, agriculture thiam thil leh a hman dan inhrilhfiahna, khawl hman tam dan, organic farming kalpui dan, agriculture leh a kaihhnawiha state sorkar hmalakna, kut hnathawktute thiamna leh zirtirna pek dan, Covid hripui lên hunlaia lo neih leh huan thlai siam kawnga state pum anga hmalak dan, GSDP ṭhan dan, mipui nawlpuiin lo neih leh huan siam kawnga tuina leh phurna an neih dan leh PFMS kalpui dante endik a ni.