DC hoin leivung paih dan enfiah

Lunglei District Monitoring Committee on Compliance of Environmental Laws chuan September 17, Inrinni khan an chairman Kulothungan A, bawrhsap hoin NH-54 package V hnathawh meka leivung paih dan, spoil bank awm zat, leivung dalna gabion wall leh protective wall awm dante an enfiah. Committee hian Hrangchalkawn, Theiriat, Ṭhaizawl, Bualte, Thualthu, Lungpuizawl, Zobawk leh Dawn khuate an tlawh a ni.

Helai hmuna hnathawktu contractor ABCI project manager Amarjit Singh tarlan danin, package V hnuaiah hian leivung paihna hmun tura ruat (designated spoil bank) 25 awmin heng zinga 15-ah hian leivung daltu gabion wall leh protective wall-te siam tawh a ni a, hmun thumah siam mek niin, la siam lohna hmun pasarih ala awm. Spoil bank 25 zinga pasarih hi hman lai mek an ni.

District Monitoring Committee chuan strict taka dan kenkawh zel an tum thu sawiin Bawrhsap chuan, "Dan bawhchhiate chungah a ṭul anga action lak a ni dawn," a ti a, designated spoil bank-ah te leivung daltu gabion/protective wall sa tura chak taka hma la turin contractor-te a hriattir nghal.

Verification Team hian leivung daltu gabion wall leh protective wall-te chu drone hmangin an enfiah a; a sak dan ṭha tawk lo leh leivung in a hnawl chhiat tawhte siam ṭha thuai turin hnathawktute an hriattir a; leivung paihna hmun tura ruat pawn lama an paih leh paih loh lo venpui turin veng/khua tin VC-te an ngen bawk.