DGP-in NCC-te hun a hmanpui

Director General of Police (DGP) Divesh Chandra Srivastva chuan Career Guidance & Counselling Cell leh NCC (Army & Air Wing)-te'n September 17, Inrinnia Serchhip College-a 'Invited lecture on fostering youth success in th 21st century' an buatsaih chu a hmanpui.

DGP Divesh Chandra Srivastva chuan, zirlai naupangte chu an hma hunah eng kawng pawh zawh dawn se a sang ber nih zel tum turin a chah a, "Hemi atan hian taimakna, tumruhna, insumtheihna leh thuawihnate a pawimawh. Mizote khawtlang huapa kan inenkawl dan hi a ṭha hle a, aia upa zawk te, nu leh pa, khawtlang hruaitute leh kohhran lama thil ṭha kan inzirtir ṭhinte hi nghet taka vawn tlat a pawimawh," a ti.

Hlawhtling tur chuan hriselna ngaih pawimawh a ṭul tih sawiin DGP chuan, "Tunlai khawvel changkang zelah social media bawihah tang lo turin insiam re ula, a ṭha zawng leh in zirlai puitu atan chauh hmang ṭhin ang che u," a ti a, Serchhip College NCC-te'n Guard of Honour an lo pe thei chu lawmawm a tih thu a sawi.