Ni hnih chhungin hripui vei 65 hmu belh

Mizoramah Covid-19 vei September 16, Zirtawpni khan mi 43 leh September 17, Inrinni khan mi 22 hmuh chhuah a ni a, nimin leh Inrinni khan hripui vei dam tawh mi 94 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 214 an awm.

September 16-a Covid-19 positive hmuh chhuah mi 43-te chu mipa 19 leh hmeichhia 24 an ni a, rapid antigen test hmanga hmuh chhuah vek niin, swab sample 360 endik aṭanga positive zat chu 12% a ni.

Inrinnia hripui vei hmuh thar mi 22-te chu mipa pariat leh hmeichhia 14 an ni a, RAT hmanga hmuh chhuah vek an ni. Swab sample 193 endik aṭanga positive zat chu 11.28% a ni.

Nimin khan hripui vei dam tawh mi 28 chhuahtir an ni a, district tina chhuak zat chu - Lungleiah pakua, Aizawlah pasarih, Saitual panga, Champhai leh Serchhipah pathum ve ve leh Mamitah pakhat a ni.

IDSP record angin, Mizoramah Covid-19 vei 2,38,043 hmuh chhuah a ni tawh a, mipa 1,10,876 leh hmeichhia 1,27,167 an ni a, mipa aiin hmeichhia 16,291-in an tam zawk. Nimin tlai dar 5 thleng khan mi 2,37,107 (99.61%) chhuahtir an ni tawh a, mi 722 (0.30%) thi tawhin, enkawl mek mi 214 (0.09%) an awm.