Vaimim chi nuai 390.2 man sem a ni ; Vaimim tihral dan tur peihfel a la ni lo ; Agriculture department-in vaimim chi kg. khat Rs. 143.5 in an lei

Agriculture department chuan SEDP hnuaiah vaimim chi chhungkaw 13,596 hnenah cheng nuai 390.20 man a sem. Hetihlai hian, vaimim thar chhuahte tihral dan tur peihfel a la ni lo.

Vanglaini-in RTI Act hmanga a zawhna Agriculture department-in an chhan danin, SEDP hnuaia vaimim chi dawng turte hi Agriculture Development Board thuchhuak anga thlan a ni. District zawng zawngah sem vek niin, a dawng tam ber district Aizawlah chuan chhungkaw 2,713 hnenah sem a ni.

Vaimim chi hi kg. khat Rs. 143.5 in lei a ni a, chhungkaw khat hnenah bag khat (kg. 20) zela sem niin, bag khat hi Rs. 2,870 man a ni. Tun dinhmunah chuan vaimim chi hi SEDP hnuaiah sem leh tumna a awm leh awm loh Agriculture department chuan an hre rih lo.

SEDP hnuaia sem vaimim chite hi sorkarin direct procurement rule hmanga a phalsak angin, Agriculture department chuan National Cooperative Marketing Federation of India, Madhya Pradesh-ah chahin an lei a ni.

SEDP hnuaia vaimim chite dawngtute thar chhuah tihral dan turah ruahmanna siam a nih leh nih loh zawhna chhangin Agriculture department chuan, "SEDP hnuaia vaimim thar chhuah hi tihral dan tur ruahmanna siam mek a ni a, peihfel thuai beisei a ni," an ti.

Vanglaini thu dawn danin, hmun ṭhenkhatah chuan vaimím chìnna hmun tur ram an neih leh neih loh zâwt chiang hmasa loin SEDP hnuaiah hian vaimim chi dawng tura thlan an ni a; dawng tura thlan zingah vaimim chìnna tur ram nei lo eng emaw zat an tel. Vaimim chi dawng tura thlan zingah dawng duh lote pawh an awm.

Aizawl veng pakhata vaimím chi dawngtu pakhat chu mi in luaha khawsa a ni a, vaimim chìnna tur ram a nei lo. Vaimim chi a dawn chu mamawh leh duh tur zâwt kualin, duh an awm chuan a pe ṭhin a ni.