Aizawlah World Bamboo Day hman a ni ; Mau hian eizawnna ngelnghet min pe thei - CM

Nimin khan Horticulture depart­ment buatsaihin Aijal Club-ah World Bamboo Day hman a ni a, Horticulture changtu chief minister Zoramthanga chu Delhi-a sorkar laipui dawra a cham lai a nih avangin a tel thei lo a, a thusawi (speech video message) ngaihthlak a ni thung.

Chief Minister chuan, Mizoram leilung hausakna mau leh ruate chuan eizawnna ngelnghet a pe thei tih hriat a, hlut a ṭul thu sawiin, World Bamboo Day puala kalkhawm zawng zawngte duhsakna a hlan.

Khuallian Bamboo Develop­ment Board vice chairman Dr K Pachhunga chuan Mizoram chu mau tamna leh duahna hmun a nih thu sawiin, "A hlutna cháng hria ram hruaitu kan nei hi kan vannei hle. Kan ramin mau hmangin malsawm­na kan chang a, ram leilung hausakna tam tak kan neih zingah mau hi kan hlut thiam a ṭul," a ti.

Inkhawm hi Horticulture secre­tary K Lalthawmmawia'n kaihruai­in, mau chingtu mi panga hnenah Best Performing Farmers' Award, Rs 5000 leh certificate hlan a ni a, mi eng emaw zat hnenah exhibition participation certificate hlan a ni bawk.

World Bamboo Day, 2022 thupui chu 'Bamboo for green life and sus­tainable development' a ni a, he ni hi mau ṭangkaina inhrilhfiahna atan khawvel pumah hman ṭhin a ni. World Bamboo Day hi a ní tak chu September 18 (Pathianni) kha a ni a, remchan zawkna avangin nimin khan hman a ni.