Siamthar lehna crusade an buatsaih

Mizoram Pradesh Congress Committee (MPCC) chuan nimin khan Congress Bhavan-ah 'Siamthar lehna Crusade' an buatsaih a, speaker atan Rev. Vanlalzuata an hmang.

Rev. Vanlalzuata chuan Pathian thu hian politics te, econo­my-te leh ni tin nunphungte a huap vek tih sawiin, "Abrahama Pathianin a koh chhan chu midang tana malsawmna a ni. Hei hian kan politics-te hi a fun vekin ka hria. Malsawmna ni turin Pathianin mipuite hmangin sorkar min pe ṭhin a, kha sorkar kha mipuite tana malsawmna ni turin Pathianin min ko a, sorkar ṭha chu mipuite pawhin mal an sawm let ṭhin a ni," a ti.

Tunlaiah Sodom khaw­puia cheng ang maiin duhamna a nasa hle nia sawiin Rev. Vanlalzuata chuan, "Politics, party chhung­ah chauh pawh a ni lo, ram pumpui mai hi duhamna, sum leh paia duhamna hian min chim tawh. Thluaka thisen tling chu hlauh­awm hle mah se, thluaka sum tling hi a hlauhawm daih zawk," a ti a, thluaka duham­na tlingin ram politics a ti dik lo a, kohhran hmel a tichhia a, chhungkua leh khawtlang nun a tihmelhem ṭhin niin a sawi.