MNF lakah mipuite'n zalenna kan sual mek - ZPM Working President

ZPM chuan nimin khan an pisa-ah chhung inkhawm an hmang a, he huna thusawitu ZPM working president K Sapdanga chuan, Mizo mipuite'n MNF lakah zalenna an sual mek niin a sawi.

ZPM Working President chuan kum 1966-ah India lakah zalenna MNF-in an sual thu sawiin, "Tunah erawh chuan Mizoram mipuite'n MNF laka zalenna kan sual mek a ni. Kum 1966-ah khan keini tlema a rual u deuhte chuan a takin kan hria a, vai vuak kan tuar a, keimahni hnam sipaite vuak kan tuar bawk. Kha kha a chhan chu India sorkar lakah hian Mizo hnam hi kan him loa kan hriat vang a ni. Zalenna sualtute kha kan zah a, kan ṭan em em a, mipute pawhin nasa takin kan tuar a ni," a ti.

MNF-in ro an rel tâk hnuah erawh chanchin thar ngaihnawm pawl ber ni ta chu 'sorkar hna­thawkin a hun takah hlawh an la mai thei' tih te, 'sum pe chhuak thei lo mahse treasury khar a ni lo' tihte a nih thu sawiin K Sapdanga chuan, "Sum pûk hmanna zawh chhuah awih lohte hi kan ram dinhmun a lo ni ta. Thluaka sum lut te, lei ba tam tual tual sorkar kan hrawn tak avangin he sorkar lak aṭang hian zalenna sual lo thei loin kan in hre ta a ni," a ti a, Mizoramah dan leh thupek pawhin awmzia a neih tawh loh thu a sawi.