Zoramthanga hi hruaitu ropui tak a ni - MNF Vice President

MNF chuan nimin khan Hnam Runah inkhawm an buatsaih a, thusawitu MNF vice president Lalthlengliana chuan an president Zoramthanga chu hruaitu ropui tak a nih thu a sawi.

Lalthlengliana chuan tunlaiin social media-ah mi ṭhenkhatin nuihza siamna atan Zoramthanga thlalak chhe tak taka siam danglama an tih nasat thu sawiin, "Heng mite hi han chhui chiang i la, veng khat leh khaw khatah pawh mite'n engah mah an ngaih lohte an ni. Khawvel hmun dangah mahni hnam pui, mahni ram hruaitu nuihza siam nana hmang ve vak vak an awm ka ring lo," a ti.

Nasa takin sawisa mah se, Zoramthanga'n huat enah a en lo nia sawiin MNF Vice President chuan, "Vawi khat pawh a la chhanglet lo. Pu Zoramthanga hi hruaitu ropui leh nunnel tak a ni," a ti a, Zoramthanga chu kum 20 chhung ram tana rammu, Pathian hriak thih a nih thu a sawi.

Lalthlengliana chuan political party dangin dawta an beihnate hnung­lama dah tura an party mite chahin, "Mizo hnam mipui hian Nehemia anga rinawmin, kan ram hi i din thar leh ang u. Party dangin an sawi fo Kamrula hna pe tam bertu leh Mizo nihna petu pawh Congress party an ni," a ti.