KHAWTHLIR

Thisen pe
Nimin khan Siaha district BJP Ṭhalaite chuan prime minister Narendra Modi piancham lawmna programme kal zelah Siaha District Hospital tan thisen unit 17 an pe. Thisen petute hi mipa 16 leh hmeichhe pakhat an ni.

Chhawmdawl dan tur sawiho
Lunglei District Level Screening Committee (DLSC) chu an chairman Kulothungan A, bawrhsap hoin nimin khan an ṭhukhawm a, August 26, 2019-a sorkar pawm loh khua (Tuichawngchhuah) a cheng chhungkaw 49 sawnchhuah takte chhawmdawl dan tur an sawiho. Lunglei DLAO leh a kaihhnawih department-te'n a hmuna kalchilhin lo zirchiang hmasa se, an ti.

In report theih
Aizawl DC leh SP te chuan October 4-9, 2022 a Agnipath Army Recruitment Rally, 2022 neih turah Aizawl district aṭanga tel tumte tan orientation programme leh physical coaching an ruahman a; phone number 9436151800/9862498311/9436146989 ah hming, address leh phone number chiang taka tarlangin in report tur a ni.

Heroin man
Champhai Police-te chuan September 17, 2022 zan khan Zokhawthar aṭanga Aizawl pan tur maxi cab-a chuang Lalzetluanga (19) s/o Khiangkhama, Melbuk hnen aṭangin heroin gram 51 an man. Heroin hi international market-ah cheng nuai 25.5 man hu a ni.

Lirthei chesualah Mi pakhat a thi
Nimin khan Bawngkawn leh Durtlang inkar, Durtlang khàmah 407 truck a tlan liam a, lirthei khalhtu Lalrintluanga (33), Durtlang Kawnveng chu a hmunah a thi. Durtlang Leitan YMA hruaitute hnen aṭanga thudawn danin, Lalrintluanga hi amahin a chuang a, chhun dar 12:10 velah Durtlang khamah hian tlan liamin, Durtlang Leitan Disaster Sub-Committee hmalaknain chawhnu dar 1:30 velah a ruang hi lakchhuah a ni. Lalrintluanga ruang hi vawiinah postmortem a ni ang.