TB umbo beihpui thlakna tur hawng

Governor Hari Babu Kambhampati chuan nimin khan Raj Bhavan-ah kum 2025 ral hmaa Mizoram aṭanga Tuberculosis (TB) natna umbo tura hmalakna tur 'State wide adoption of Pradhan Mantri TB Mukt Bharat Ahiyan' a hawng. Mizoramah TB vei inenkawl mek mi 1,360 an awm thu tarlan a ni.

Governor Hari Babu Kambhampati chuan, kum nga chhungin Mizoramah TB natna umbo a nih theih a rin thu a sawi a, "He beihpui thlaknaah hian sorkar, NGO, kohhran leh mi zawng zawng kan inlungruala, ṭha taka kan thawhho a pawimawh dawn," a ti a, TB natna leh inenkawlna chungchangah uar zawka inzirtirna kalpui ṭul a tih thu a sawi.

TB natna veite chu ṭanpui ngai an nih thu sawiin Governor chuan,"Taksa tichak tur leh TB damdawi hnathawhpui turin TB veite'n ei leh in tur ṭha an mamawh a, anmahni ṭanpuina atan Nikshay Mitra Programme kaltlangin pawisa kan thawh a ngai. Thla khat a tan chauh emaw thla eng emaw chen chhung, kum khat chhung leh a aia rei pawh ṭanpuina pe turin reports.nikshay.in/FormIO/DonorRegistration-ah hian rawngbawlna rawn nei ṭheuh turin kan insawm a ni," a ti.

Health minister Dr R Lalthangliana pawhin thu sawiin, "Ṭanrual hi chakna tih hripui leng donaah a chiang tawh a, khatiang bawk khan HIV/AIDS dona leh cancer natna ti tlem tura beihrual kawngah sorkar, tlawmngai pawlte leh kohhrante'n theihtawp kan chhuah tlang leh mek," a ti.

TB natna umbo tura tehfung atan kum 2015 hman a ni tih sawiin Dr R Lalthangliana chuan, "Kum 2015-a TB natna thihpui zat aia TB veia thi 80% in a tlem zawk hunah hlawhtling anga chhiar kan ni dawn," a ti.

Health Minister sawi danin, Mizoramah kum 2015 khan TB avangin mi 38 an thi a – he statistics aṭanga chhut chuan kum 2025-ah chuan Mizoramah TB natna avanga nunna chán mi pali aia tam an awm lohna tura hmalak a ngai a ni.

TB natna vei zinga a tam zawkin ṭanpuina – food basket an dawng duh tih an tihchian tawh thu leh hei hi sorkar aṭanga a thlawna damdawi leh nutritional support atana NHM aṭanga thla tin an dawn baka mamawh a nih thute sawiin Dr Thangtea chuan,"He rawngbawlnaah hian elected leader, sorkar hnathawk, sumdawng, pawl ang leh mi mal angin TB natna veite tana rawn luang chhuak turin ka sawm che u a ni," a ti.

He hunah hian Governor chuan mi inphalte'n food basket atana pawisa an thawh chu TB vei ṭhenkhat hnenah a hlan a ni. A bulṭan nan Governor hian TB vei mi 20-te chaw ṭha leina tur kum khat atan a tum sak dawn tih a puang a, Health Minister pawhin TB vei mi 10 tan an kum khat chaw ṭha leina tur a tumsak dawn bawk.