MNF sorkarin central scheme-te an kalpui ṭha lo lutuk hi a pawi - MBJP President

Mizoram BJP president Vanlalhmuaka chuan MNF kaihhruai sorkar chu central scheme kalpui ṭha loah puhin, "A pawi hle," a ti. Vanlalhmuaka hian nimin khan an party pisa-ah thu a sawi.

Vanlalhmuaka chuan mipui hmasawnna tura chhawpchhuah central scheme-te chu MNF sorkarin a kalpui dan tur dik takin kalpui se chuan, kuthnathawktute, health care lama thawktute leh mi bawrhsâwmte chuan tuna an harsatna tawh tam tak hi sutkian a nih ngei a rin thu sawiin, "Mizo mipuite hi kan harhchhuah a hun tawh takzet a, mipui rawngbawltu dik tak kan thlan chhuah thiam a hun tawh," a ti.

Ram leh hnam ṭawngka chauha hmangaihtute hnawl an nih hun hunah kawng hrang hranga intodelhna a rawn thlen tur thu sawiin Vanlalhmuaka chuan, "Central aṭanga sum lo kal ṭhin hian a thlenna tur dik thleng ṭhin ngat sela chuan he ti mai hi chu kan ni tawh lo tur a ni," a ti a, Mizoram hruaitute chu mahni inhmangaihnaa khat an nih vangin mipui retheihna an hriatpui ngai loh thu a sawi.

MBJP President chuan Mizoram hmasawnna kawng tiṭhuanawmptu leh chhiatna bulpui ber eirukna hnungkhirh a hun tawh tih sawiin, "Chumi tihlawhtling ngam tur awm chhun chu BJP te kan ni. Mizorama party dangte hian hnathawh tur tam tak han sawi ṭhin mah se, central-a sorkar BJP tel lo chuan an tum angin an awm thei dawn lo. Chuvangin, Mizo mipui kan harhchhuah a ngai tawh takzet," a ti.